Börnin skömmuð á leiðinni heim eftir mótin

Foreldrahegðun á íþróttamótum barna var til umræðu í síðasta þætti af Hliðarlínunni sem sýndur er á Stöð 2 og Stöð 2 Sport á mánudagskvöldum. Foreldrar láta oft í sér heyra og hrópa á börnin á meðan það þau eru að keppa.

Vanda segir hegðun foreldra meðal annars hafa verið rædda á ungmennaþingi KSÍ í fyrra. Þingið sátu í kringum sextíu ungmenni á aldrinum 12-18 ára og var þetta það fyrsta sem þau tóku fyrir á þinginu. Það hafi komið alveg skýrt fram að börnin sjálf vilja ekki sjá þessa hegðun.

„Þá voru þau svona að ræða að þetta geta verið náttúrulega leikirnir sjálfir en þetta getur líka verið fyrir leik og svo eftir leik. Það eru alveg til börn sem að kvíðir svolítið fyrir að fara í bílinn eftir leik af því mamma eða pabbi er að yfirheyra og jafnvel að skamma fyrir einhverjar frammistöðu í leiknum og svo framvegis.“

„Við viljum þetta ekki“

Börnin upplifa oft mikla pressu frá foreldrum og vanlíðan. Umboðsmanni barna hafa til að mynda borist fyrirspurnir frá börnum sem eru ósátt við hegðun foreldra sinna á íþróttamótum. 

„Þegar að foreldrar svona missa sig í eitthvað rugl það er eitthvað sem að ég og við hjá KSÍ viljum náttúrulega alls ekki og heldur ekki félögin í landinu. Við viljum þetta ekki. Við viljum að börnin fái að vera börn og fái að spila fótbolta og íþróttir á þeirra forsendum sem er nú kannski bara að vera með vinum sínum fyrst og fremst og hafa gaman,“ segir Vanda.

Hún segir KSÍ og félögin hafa verið að reyna að taka á þessu. Foreldrafundir í aðdraganda móta geti verið mikilvægir til að ræða hvaða hegðun sé viðeigandi. Mikilvægt sé að breyta þessari menningu sem myndast hefur á mótunum.

„Tökum ákvörðun bara fullorðna fólk og hættum þessu. Minnum hvort annað á. Ef einhver er að fara yfir strikið. Það er svo týpískt að við skiptum okkur ekki af. Stundum gleymir fólk sér bara aðeins í hita leiksins og svona. Við eigum að hnippa í hvort annað. Við þurfum að taka okkur á fullorðna fólkið og við hjá KSÍ styðjum það að sjálfsögðu og höldum okkar vinnu áfram og félögin gera það áfram en við þurfum að fá foreldra í lið með okkur og það er svolítið það sem ég er að kalla eftir.“

Dómarar í leikjum barna eru oft sjálfir börn og geta verið allt niður í þrettán ára. Vanda segir æskilegra að dómarar séu eldri en á mótum sé leikjafjöldi oft það mikill að það náist ekki að manna nema að líka séu ungir dómarar.

„Ef þú ert foreldri á móti og það er fjórtán ára dómari að dæma þá sérðu alveg að þetta er ungur dómari og ef eitthvað er þá áttu að vera með enn þá betri hegðun. Þó reyndin virðist vera að þá sé verri hegðun ef hann er ungur en það á að vera öfugt.“

Þá geti það breytt miklu ef sjálfboðaliðum myndi fjölga og fleiri fullorðnir bjóða sig fram til að sinna dómgæslu á mótum.

„Það gæti verið lausnin á þessu að foreldrarnir og við fullorðna fólkið að við mætum og dæmum en þá þurfa félögin ekki að vera að setja svona unga dómara“

Næsti þáttur af Hliðarlínunni verður á Stöð 2 og Stöð 2 Sport í kvöld en þá verður fjallað um meiðsli barna í íþróttum. Þá er líka hægt að sjá þættina á Stöð 2+.