Lærisveinar Arons tóku risaskref í átt að Ólympíuleikunum

Eins og lokatölurnar gefa til kynna var leikurinn jafn og spennandi frá upphafi til enda. Bareinska liðið hefur í gegnum tíðina oft mátt þola tap gegn því katarska í stórum leikjum og má þar nefna fjögur töp í úrslitum Asíukeppninnar á síðustu fimm árum.

Lærisveinar Arons höfðu eins marks forystu í hálfleik, 15-14, og munurinn var einnig aðeins eitt mark þegar flautað var til leiksloka. Bareinska liðið skoraði sigurmarkið á lokasekúndum leiksins og tryggði sér þar með nauman sigur, 30-29, og um leið sæti í úrslitum undankeppninnar.

Barein mætir Japan eða Suður-Kóreu í leik um laust sæti á Ólympíuleikunum, en Japan og Suður-Kórea mætast í dag og er sá leikur nú þegar hafinn. Dagur Sigurðsson er þjálfari japanska liðsins og því gæti það farið svo að tveir íslenskir þjálfarar berjist um eitt laust sæti.