Valsmenn geta unnið fimmta leikinn í röð í Síkinu í kvöld

Tindastóll og Valur hafa mæst í mögnuðum lokaúrslitum undanfarin tvö tímabil og úrslitin réðust í oddaleik í bæði skiptin. Stólarnir unnu Íslandsmeistaratitilinn síðasta vor en án þess þó að vinna heimaleik í einvíginu á móti Vals.

Valsmenn sóttu líka sigur á Krókinn í Meistarakeppni KKÍ í upphafi tímabilsins og unnu einnig deildarleik sinn á Sauðárkróki á síðustu leiktíð.

Nú er því staðan sú að Valsmenn hafa unnið fjóra síðustu leiki sína í Síkinu og alla leiki sína á Króknum frá og með júní 2022. Sautján mánaða tak.

Tindastóll hefur aðeins tapað sex heimaleikjum á þessum sautján mánuðum og því hafa 67 prósent þessa tapleikja í Síkinu komið á móti Val.

Leikurinn hefst klukkan 19.15 og verður sýndur beint á Stöð 2 Sport. Útsendingin hefst klukkan 19.00 og strax á eftir verður öll umferðin gerð upp í Subway Körfuboltakvöldi.