Mate svekktur: Ef ein­hverjum líkar það ekki þá þarf hann bara að spila í öðru landi

 „Ég er svekktur hvernig við erum allan þennan leik. Annað hvort erum við alltof linir og seinir úti um allt, eða við erum agressífir og gjörsamlega heilalausir.“ 

Heilalausir að hvaða leyti? 

„Bara „bailum“ þá út, spilum kannski góða sókn í 20 sekúndur, þá klikkar einhver á einhverri skiptingu, við eltum vitlausan mann, stígum ekki nógu hátt á Remy Martin, förum ekki með gabbhreyfingunni hjá Igor Maric. Það voru svo mörg augnablik hérna í seinni hálfleik. Við dripplum tvisvar í Halldór Garðar í seinni hálfleiknum og biðjum um eitthvað. Ég er mjög svekktur hvað við erum „soft“ eða vitlausir til skiptis.“

Haukar náðu að jafna leikinn í lokaleikhlutanum eftir að hafa hafið hann sextán stigum undir. 

„Auðvitað horfi ég á lokamínúturnar. Það sem við erum að framkvæma í lokin er ekki gott. Ég teikna eitthvað upp, það svíngengur, en svo eru menn að snúa í vitlausa átt og gera eitthvað allt annað en það sem gekk upp.“ 

„Ég held það sé af því ég er með rosalega marga sem hafa ekki spilað á Íslandi. Hér má halda og „hand-check-a“. Mínir menn fórna höndum og væla og láta ýta sér út úr öllu. Plús það að ungu strákarnir sem eru að fá að spila hérna á erfiðum útivelli eru „soft“, láta ýta sér út úr öllu, horfa ekki á körfuna. Menn þurfa aðeins að átta sig á því hvernig línan er hérna. Hún er öðruvísi en í háskólaboltanum, hún er öðruvísi en í öðrum löndum. Ef einhverjum líkar það ekki þá þarf hann bara að spila í einhverju öðru landi.“ 

Mate sjálfur er ekki ósáttur við línuna í dómgæslunni. 

„Ég elska íslenskan körfubolta. Mér finnst gaman að sjá þetta. Við tókum loksins þátt í þessu í fjórða leikhluta, enda komst Keflavík þá ekki neitt. Einu körfurnar sem þeir fengu voru eftir sóknarfráköst eða „bail-out“ vítaskot. Þegar við héldum svolítið í þá og tókum þátt í fætingnum sem er leyfður hérna. Maður sá strax þegar dómararnir mættu, þetta eru reynslumiklir dómarar, við erum í Keflavík, við vissum að það mætti „hand-check-a“ hérna í kvöld. Ég sagði strákunum það. En við náum ekki að hlaupa rassgat í 32 mínútur af því að mönnum finnst það óþægilegt.“

„Benda alltaf á einhverjar FIBA-reglur og segja mér að tala við einhverja þrotamenn þar“

Mate talaði um að Keflavík hefði átt að fá fimm óíþróttamannslegar villur (U-villur) í leiknum. 

„Þeir útskýrðu fyrir mér að þetta væri hagnaðarregla,“ sagði Mate um atvik í lok fyrri hálfleiks þegar brotið var á hans manni en ekki dæmt. 

„Ég veit ekki alveg hver hagnaður er þegar það er verið er að reyna hægja á okkur og negla mann á opnu gólfi. Jalen fékk sniðskot, en það er líka erfitt að spila þegar þú ert kominn með eina U-villu og kominn með 3-4 villur. Þetta eru einhverjar áherslur, þeir benda alltaf á einhverjar FIBA-reglur og segja mér að tala við einhverja þrotamenn þar,“ sagði Mate. 

Hann hefur ekki áhyggjur af því að vera 2-3 eftir fimm leiki. 

„Við hefðum getað unnið þennan leik og hefðum getað unnið í Þorlákshöfn þrátt fyrir að spila ömurlega. Ég hef áhyggjur af því hvað við spilum stuttan kafla eins og okkur sé ekki alveg sama í vörn,“ sagði þjálfarinn að lokum.