Lág­mark um tvær vikur í að Grind­víkingar geti flutt aftur heim

Hann segir það til skoðunar hvort að íbúar fái að fara heim. Enn sé óljóst hvar kvikan kemur upp og hættusvæðið því enn stórt. „Við erum að skoða þetta og hvað er hægt að gera,“ segir Víðir. Hann segir að öryggi fólks sé alltaf í forgrunni. 

Eins og fram hefur komið funda vísindamenn Veðurstofu Íslands nú með viðbragðsaðilum. Þar er farið yfir nýjustu gögn vegna jarðhræringanna í Grindavík og staðan metin, meðal annars hvort hægt sé að hleypa íbúum heim að sækja nauðsynjar og gæludýr.

Algjör biðstaða

Víðir segir stöðuna núna algera biðstöðu. „Við erum bara að bíða eftir að það fari að gjósa,“ segir Víðir og að það væri miklu líklegra að það gerðist en ekki þegar kvikan er komin svona grunnt. Hann segir sviðsmyndina þannig að það geti opnast á ganginn hvar sem er og það verði hraungos.

Víðir segir fólkið í bænum það mikilvægasta. Það væri ekki alltaf hægt að bæta hluti sem þau geti misst en að Grindvíkingar hafi sammælst um að koma sér út með góðum hætti á föstudag. Hann segir alveg sama hvað gerist næst, þá sé alltaf að lágmarki um tvær vikur hvort íbúar geti flutt heim. 

„Það er gríðarleg óvissa fyrir þetta fólk,“ segir Víðir. Hann segir almannavarnir líka horfa til lengri tíma og að mikil vinna sé framundan við að laga það tjón sem þegar hefur orðið á innviðum í bænum.

Fyrsta mál að koma börnum í skóla

Víðir segir næstu skref unnin í samráði við Grindvíkinga og sveitarstjórnina. Það sé unnið hörðum höndum að því að finna aðstöðu fyrir þau svo hægt sé að halda uppi starfsemi stjórnkerfisins. Með fyrstu málum á dagskrá hafi verið að koma börnum í skóla og að það sé unnið hörðum höndum að því.

„Lífið er á hvolfi en það eru allir af vilja gerðir til að hjálpa. Við höfum oft talað um hvað það skiptir miklu máli, þegar reyni rá, að sýna samstöðu og það reynir virkilega á það núna.“

Spurður um varnargarða segir Víðir stjórnvöld komin nokkuð langt í hönnun þeirra. Á svæðið séu komnar vinnuvélar og síðustu sólarhringa hafi verið ekið með efni að Sýlingarfelli og aðra staði þar sem hraun gæti runnið að, annað hvort að byggð eða virkjuninni.  „Heilsa velferð og íbúa í Grindavík er númer eitt, tvö og þrjú,“ segir Víðir.