„Skiptir rosa­lega miklu máli fyrir þetta lið“

Þórsarar höfðu yfirhöndina stærstan hluta leiksins og sigur þeirra var í raun nánast aldrei í hættu. Heimamenn unnu að lokum 96-79 í Þorlákshöfn og fyrirliðinn Emil skilaði 18 stigum fyrir liðið.

„Þetta skiptir rosalega miklu máli fyrir þetta lið. Þetta er fyrsti góði leikurinn hans Emils og þá á hann líka bara frábæran leik,“ sagði Ómar Örn Sævarsson þegar félagarnir í Subway Körfuboltakvöldi ræddu um frammistöðu Emils.

„Það er meira en bara þessi stig sem hann er að skora. Mér fannst hann vera svo peppandi og hann og Dabbi [Davíð Arnar Ágússton, leikmaður Þórs] finnst mér vera mikilvægustu leikmennirnir í þessu liði upp á hjartað og peppið,“ bætti Ómar við.

Magnús Þór Gunnarsson tók í sama streng og Ómar, en gagnrýndi Emil og aðra heimastráka þó einnig fyrir frammistöðu sína í heild sinni á tímabilinu.

„Það sem ég er svekktastur með í kringum þessa íslensku stráka sem eru í rauninni hjartað í Þorlákshöfn er að það á ekkert að skipta máli hvort þú byrjir inná vellinum eða komir inná. Þeir eiga alltaf að vera tilbúnir,“ sagði Magnús meðal annars, en innslagið má sjá í heild sinni hér fyrir neðan.