Auður hættir ó­vænt hjá Stjörnunni

Þetta eru óvæntar fréttir enda hefur Auður gert frábæra hluti með hið unga lið Stjörnunnar. Liðið komst upp í Subway deildina síðasta vor og er í þriðja sæti nú þegar deildin fer í jólafrí.

Auður hefur þjálfað liðið ásamt Arnari Guðjónssyni, þjálfara meistaraflokks karla hjá Stjörnunni. Arnar heldur áfram þjálfun liðsins.

Stjörnuliðið hefur unnið níu af þrettán deildarleikjum sínum í vetur og er aðeins tveimur stigum á eftir Njarðvík sem situr í öðru sæti deildarinnar.

Auður kom fyrst til Stjörnunnar 2018 sem leikmaður, og var meðal annars valin besti varnarmaður efstu deildar 2018/19 þegar hún lék með Stjörnunni. Árið 2021 tók hún við þjálfun liðsins og hefur gert það með Arnari Guðjónssyni til dagsins í dag.