Þjálfararnir í fyrsta sinn ekki báðir ís­lenskir

Ísland og Austurríki mætast í dag í lokaleik sínum í milliriðli tvö á EM í Þýskalandi og þetta er gríðarlega mikilvægur leikur fyrir báðar þjóðir.

Þetta er þriðja viðureign Íslands og Austurríkis í úrslitakeppni EM karla í handbolta og sú fyrsta í tíu ár.

Hinar viðureignirnar fóru fram á EM 2010 og EM 2014. Ísland gerði 37-37 jafntefli í Linz í Austurríki 21. janúar 2010 en vann 33-27 sigur í Herning í Danmörku 18. janúar 2014.

Þjóðirnar mættust líka á HM 2011 í Svíþjóð og þar vann Ísland 26-23 sigur. Þjálfari Austurríkismanna í þeim leik var Svíinn Magnus Andersson.

En aftur að viðureignunum á EM. Í þeim báðum voru þjálfarar beggja liða íslenskir.

Get vel skilið gremju landa minna og vina

Þegar Ísland mætti Austurríki á Evrópumótinu í Austurríki fyrir fjórtán árum þá var Dagur Sigurðsson þjálfari austurríska liðsins en Guðmundur Guðmundsson með íslenska liðið.

Leikurinn var líka mjög eftirminnilegur, mikið skorað og mjög sérstakur endir. Snorri Steinn Guðjónsson kom íslenska liðinu þremur mörkum yfir, 37-34, þegar 59 sekúndur voru eftir að leiknum og sigurinn var í höfn að mati flestra.

Austurríkismönnum tókst hins vegar að skora þrjú mörk á síðustu 50 sekúndum leiksins, eitt þegar 50 sekúndur voru eftir, annað þegar 23 sekúndur voru eftir og það þriðja sjö sekúndum fyrir leikslok. Sigurmarkið kom með skoti frá eigin vallarhelmingi og yfir Hreiðar í markinu sem stóð of framarlega.

Lokatölurnar urðu því 37-37.

„Ég get vel skilið gremju landa minna og vina. Það eru núna tveir leikir í röð þar sem þeir missa unninn leik niður í jafntefli,“ sagði Dagur Sigurðsson við Morgunblaðið.

„Ég klikkaði. Það var það sem gerðist og því fór sem fór,“ sagði Guðjón Valur Sigurðsson við Fréttablaðið. Guðjón Valur fékk línusendingu þegar hálf mínúta var eftir af leiknum í gær og Ísland tveimur mörkum yfir. Skot hans var hins vegar varið og Austurríkismenn náðu með ótrúlegum lokakafla að jafna metin áður en leiktíminn rennur út. „Ég hafði tækifæri til að klára leikinn en gerði það ekki. Þannig komust þeir aftur inn í leikinn. Ég tek þetta einfaldlega á mig því ég á að gera miklu betur,“ sagði Guðjón Valur.

Naut þess ekki að horfa á Ísland spila

Þremur árum seinna var Patrekur Jóhannesson orðinn þjálfari austurríska landsliðsins en að þessu sinni hélt íslenska liðið út leikinn og vann þriggja marka sigur, 33-27. Íslenska liðið var reyndar níu mörkum yfir, 31-22, þegar sjö mínútur voru eftir an austurríska liðið náði aðeins að laga stöðuna í lokin. Aron Kristjánsson þjálfari þarna íslenska liðið.

„Íslenska liðið spilaði vel og lét okkur líta illa út. Þeir voru mjög einbeittir og ég var búinn að vara mína menn við því. Það er stundum erfiðara að framkvæma þá hluti. Ísland var sterkara,“ sagði Patrekur við Vísi eftir leikinn.

„Ég naut þess ekki að horfa á Ísland spila í dag en ég mun njóta þess það sem eftir lifir mótsins. Ísland er með frábært lið og liðið á eftir að bíta áfram frá sér,“ sagði Patrekur.