Ceferin býður sig ekki aftur fram sem for­seti UEFA

Ceferin tók við sem forseti UEFA af Michel Platini þegar Frakkinn var dæmdur í bann frá fótbolta 2016. Ceferin mun sitja á forsetastóli UEFA til 2027 þegar verður kosið næst.

„Fyrir sex mánuðum ákvað ég að ég myndi ekki bjóða mig aftur fram. Ástæðan er að eftir einhvern tíma þurfa öll samtök nýtt blóð en aðallega vegna þess að ég hef verið sjö ár frá fjölskyldu minni,“ sagði Ceferin á blaðamannafundi eftir ársþing UEFA í París.

Þessi tíðindi koma skömmu eftir að UEFA breytti reglum sínum sem hefði gert Ceferin kleift að bjóða sig aftur fram 2027 og sitja þá á forsetastóli til 2031.