Byrja í Laugar­dalnum en spila síðasta leikinn í Wales

Ísland lenti í riðli með Wales, Svartfjallalandi og Tyrklandi þegar dregið var í riðla í B deild Þjóðadeildarinnar í gær.

Leikirnir fara fram í september, október og nóvember á þessu ári en sá fyrsti verður á móti Svartfjallalandi á Laugardalsvellinum föstudaginn 6. september. Þremur dögum síðar spilar liðið fyrsta útileikinn sem verður í Tyrklandi.

Íslenska liðið spilar síðan hina tvo heimaleikina í októbermánuði, 11. október á móti Wales og 14. október á móti Tyrklandi.

Síðustu tveir leikirnir verða síðan útileikir í nóvember. Liðið spilar í Svartfjallalandi 16. nóvember og spilar síðan í Wales þremur dögum síðar.