Biden brást reiður við skýrslu um leyniskjöl

Í skýrslunni skrifaði Robert Hur að meðal ástæðna fyrir því að hann legði til að Biden yrði ekki ákærður væri að forsetinn gæti við réttarhöld málað sig sem vel meinandi eldri mann með stöpult minni, eins og hann hefði gert í skýrslutökum. 

Hann hélt því einnig fram að Biden hefði ekki munað hvaða ár sonur hans Beau dó úr krabbameini. Það var árið 2015, þegar Biden var varaforseti Baracks Obama.

Skýrsluna má finna hér á vef dómsmálaráðuneytisins.

Biden, sem er 81 árs gamall, brást reiður skrifum Hur á blaðamannafundi í gær.

Á blaðamannafundinum í gær deildi Biden jafnvel við blaðamenn og svaraði á kaldhæðinn máta. Hann brást sérstaklega reiður við þegar hann var spurður út í skrif Hur um minni hans.

„Ég meina, ég er vel meinandi maður, ég er eldri maður og ég veit hvurn andskotann ég er að gera,“ sagði Biden við blaðamenn í gær.

Forsetinn þvertók fyrir að hafa sýnt öðrum leynileg skjöl og skaut á Hur fyrir að opinbera efasemdir um minni hans. Biden var sérstaklega reiður yfir skrifum Hur um að hann mundi ekki eftir því hvenær Beau lést.

„Það er meira segja tilvísun þarna um að ég muni ekki hvenær sonur minn dó. Hvernig í andskotanum dirfist hann til að skrifa það?“

Biden sagðist muna vel eftir dauða sonar síns.

„Ef satt skal segja, þegar ég var spurður þessarar spurningar, fannst mér það ekki koma þeim við,“ sagði Biden. „Það þarf enginn að minna mig á hvenær hann dó.“

Blaðamenn Washington Post segja að Biden hafi verið enn reiðari á fundi með þingmönnum Demókrataflokksins fyrr um daginn. Eftir að hann var spurður hvernig hann hefði það.

„Hvernig í andskotanum á ég að hafa gleymt deginum sem sonur minn dó? Auðvitað man ég það.“

Kannanir vestanhafs hafa sýnt að kjósendur hafa áhyggjur af aldri Biden, en hann fæddist árið 1942. Donald Trump fæddist árið 1946.

Ekki bara ósáttur

Biden var þó ekki eingöngu ósáttur við Hur. Hann lýsti yfir ánægju með að rannsakandinn hefði gert greinarmun á milli máls hans og skjalamáli Donalds Trump, væntanlegs mótframbjóðanda Biden í forsetakosningunum í nóvember.

Trump hefur verið ákærður fyrir að taka mikið magn opinberra gagna og leynilegra skjala með sér úr Hvíta húsinu. Þá neitaði hann lengi að afhenda gögnin og reyndi að fela gögn fyrir rannsakendum Alríkislögreglu Bandaríkjanna, miðað við ákærur gegn forsetanum fyrrverandi.

Um svipað leyti fundust opinber gögn í vörslu Bidens. Þar á meðal voru leynileg skjöl. Skjölin eru sögð vera frá þeim tíma er hann var varaforseti Baracks Obama og hefði Biden lögum samkvæmt átt að skila þeim til Þjóðskjalasafns Bandaríkjanna.

Biden skilaði gögnunum þó um leið og þau fundust og tilkynnti fund þeirra til yfirvalda.

Sjá einnig: Sérstakur rannsakandi skoðar leynileg skjöl í vörslu Bidens

Í fyrra kom fram í dómskjölum frá Jack Smith, sem hefur skjalamál Trump til rannsóknar, að fyrrverandi starfsmaður í Mar a Lago, sveitaklúbbi og heimili Trumps í Flórída, hefði breytt framburði sínum varðandi það hvort einhver hefði reynt að eyða upptökum öryggismyndavéla í byggingunni.