Salome til Transition Labs

Í tilkynningu kemur fram að Salome hafi mikla reynslu á sviði umhverfis-, sjálfbærni- og loftslagsmála. Hún komi til Transition Labs frá matvælaráðuneytinu þar sem hún hafi sérfræðingur á skrifstofu sjálfbærni.

„Hlutverk Salome verður að byggja upp starfsemi Rastar í samstarfi við Carbon to Sea Initiative sem er óhagnaðardrifin bandarísk sjálfseignarstofnun. Markmiðið er að efla alþjóðlegar rannsóknir og þekkingu á hlutverki hafsins við að fanga og binda gróðurhúsalofttegundir úr andrúmsloftinu.

Áður hefur Salome starfað sem sérfræðingur í umhverfis- og auðlindaráðuneytinu, ráðgjafi í umhverfismálum hjá Environice og sem verkefnastjóri og síðar framkvæmdastjóri Landverndar.

Salome er umhverfisfræðingur að mennt. Hún lauk B.Ed. gráðu í kennslu náttúrugreina í Kennaraháskóla Íslands árið 2005 og árið 2011 lauk hún M.Sc gráðu í umhverfisfræðum frá Háskólanum í Lundi í Svíþjóð,“ segir í tilkynningunni.

Um Transition Labs segir að félagið leiti uppi framúrskarandi erlend loftslagsverkefni, aðstoði við að koma þeim á legg hér á landi og auðveldi þeim að skala fyrirtækin upp í rekstrarhæfa stærð. Fyrirtækið á í samstarfi við sum af metnaðarfyllstu loftslagsverkefnum heims. Að baki stofnun Transition Labs standa Davíð Helgason, stofnandi Unity og Kjartan Örn Ólafsson, frumkvöðull og tæknifjárfestir.