Þjóð­verjar veðja á Al­freð næstu árin en setja fyrir­vara

Alfreð verður þar með treyst til að stýra þýska liðinu fram yfir heimsmeistaramótið sem fram fer í Þýskalandi í janúar 2027.

Reyndar er sá fyrirvari settur að Þýskaland verði að komast í gegnum ólympíuumspilið í þessum mánuði. Annars renni samningur Alfreðs út á þessu ári.

Alfreð hefur stýrt þýska liðinu síðustu fjögur ár og kom liðinu í undanúrslit á heimavelli á EM í janúar síðastliðnum, þar sem Þýskaland endað í 4. sæti.

„Ég er mjög þakklátur fyrir það traust og tækifæri sem ég fæ til að stýra landsliðinu í vegferðinni fram til 2027. Það býr gríðarlega mikið í þessu liði til að ná afar langt á næstu stórmótum. Næstu dagar fara hins vegar í að gera allt til þess að allt gangi upp í undankeppni Ólympíuleikanna,“ sagði Alfreð á heimasíðu þýska sambandsins.

Þýskaland verður á heimavelli í undankeppni Ólympíuleikanna, 14.-17. mars, og berst við nýju lærisveinanna hans Dags Sigurðssonar í Króatíu, sem og Austurríki og Alsír, um tvö laus sæti á leikunum í París í sumar.

Alfreð, sem er 64 ára gamall, stýrði Þýskalandi til 5. sætis á síðasta heimsmeistaramóti, fyrir rúmu ári síðan, og eftir árangurinn á EM er liðið öruggt um sæti á næsta HM, í janúar næstkomandi.

Auk þess að semja við Alfreð þá framlengdi þýska sambandið samning sinn við Markus Gaugisch, þjálfara kvennalandsliðsins, fram á sumarið 2026.