Svipað veður en bætir í vind með páska­helginni

Þetta kemur fram í hugleiðingum veðurfræðings á Veðurstofunni.

„Yfir Norðaustur-Grænlandi er hæð og frá henni hæðarhryggur yfir landinu. Fremur hægar norðaustanáttir og dálítil él á víð og dreif, en léttir til suðvestanlands síðdegis,“ segir í hugleiðingunum

Í dag er búist við austan og norðaustan 5-13 m/s og skýjað með köflum, en dálítil él á víð og dreif. Léttir til suðvestanlands eftir hádegi. Hæg norðaustlæg eða breytileg átt og dálítil él á víð og dreif á morgun, en léttskýjað suðvestantil. Frost víða 0 til 8 stig, en frostlaust sunnantil yfir daginn. 

Á höfuðborgarsvæði verður austan 3-10 m/s og stöku él, en léttir til uppúr hádegi. Hæg austlæg átt og léttskýjað á morgun. Hiti 0 til 5 stig að deginum

Veðurhorfur næstu daga

Á mánudag:

Norðan 8-15 m/s austanlands framan af degi, en annars norðaustlæg átt, 3-10 m/s. Dálítil él um landið norðaustanvert, en lengst af þurrt og bjart annars staðar. Frost víða 0 til 12 stig, en frostlaust við suðurströndina.

Á þriðjudag:

Austan og norðaustan 5-13 m/s og dálítil él, en yfirleitt úrkomulaust á Vesturlandi. Talsvert frost um land allt.

Á miðvikudag, fimmtudag, föstudag og laugardag:

Norðaustankaldi eða -strekkingur og víða dálítil él, en bjartviðri suðvestantil og áfram svalt í veðri.