Órói hefur haldist stöðugur frá því á mánudegi en hraun rennur áfram í hrauná til suðurs frá gígunum að mestu ofan á hraunbreiðunni sem myndaðist á fyrstu dögum gossins. Þetta kemur fram í tilkynningu frá Veðurstofu Íslands en á myndinni fyrir neðan má sjá útbreiðslu hraunsins eins og það var kortlagt frá gervitunglamynd síðan 26. mars og svæði þar sem breytingar hafa orðið á milli 20. og 26. mars.
Í frétt Veðurstofunnar segir að skástrikaðar þekjur sýni svæði þar sem breytingar hafa orðið á hraunbreiðunni á milli 20. og 26. mars. Sá hluti skástrikaða svæðisins sem er rauðlitaður táknar svæði þar sem hraun hafði ekki runnið yfir áður í þessu eldgosi, þar á meðal er Melhólsnáma sunnan Hagafells. Ljósfjólubláar þekjur sýna svæði þar sem hraun rann frá eldgosum í febrúar og janúar.
Í Svartsengi mælist enn landris en mun hægara en það hefur verið fyrir þau eldgos eða kvikuhlaup sem orðið hafa á síðustu mánuðum. Samkvæmt sérfræðingum Veðurstofunnar bendir það til þess að enn safnist upp kvika í söfnunarsvæðið undir Svartsengi þótt það sé eldgos í gangi. Lítil sem engin skjálftavirkni hefur mælst á svæðinu.
Áfram hætta á gasmengun
Veðurstofan hefur síðustu daga, í samstarfi við Almannavarnir, bætt við gasmælum á tveimur stöðum til að fylgjast með gasmengun (SO2). Annar þeirra er staðsettur við Bláa lónið og hinn á hafnarsvæði Grindavíkur. Þetta er viðbót við þá mæla sem Umhverfisstofnun heldur úti. Báðar stöðvarnar eru að streyma gögnum á vefsíðu Umhverfisstofnunar .
Há gildi brennisteinsdíoxíðs (SO2) mældust í skamma stund í Grindavík í nótt (allt upp í 9000 míkrógrömm/m3) en þau lækkuðu fljótt aftur niður í eðlileg gildi. Há gildi brennisteinsdíoxíðs (SO2) mældust í Bláa lóninu og í Höfnum í gær.
Hæst fóru gildin í 7000 microgröm/m3 í Bláa lóninu og í 2000 microgröm/m3 í Höfnum. Slíkur styrkur er talinn mjög óhollur og líklegt að flestir gætu fundið fyrir einkennum í öndunarfærum. Gaslosun frá eldgosinu er líkleg til að valda áfram mengun á Reykjanesskaganum og er fólki á svæðinu bent á að fylgjast með á loftgæði og kynna sér þar viðbrögð við loftmengun frá eldgosinu.
