Ís­land ekki í neðsta flokki fyrir EM

Hér að neðan má sjá styrkleikaflokkana:

Stelpurnar okkar tryggðu sig endanlega inn á EM í gær þegar þær unnu Færeyjar á Ásvöllum, 24-20. Ísland endaði því í 2. sæti síns undanriðils, á eftir Svíum sem unnu alla sína leiki.

Færeyingar náðu hins vegar einnig inn á EM, sem eitt af fjórum liðum með bestan árangur í 3. sæti í undanriðlunum átta.

EM hefst 28. nóvember og stendur yfir til 15. desember. Mótið hefur verið stækkað og í fyrsta sinn taka 24 þjóðir þátt, en spilað verður í Austurríki, Sviss og Ungverjalandi.

Á fimmtudaginn í næstu viku verður dregið í sex fjögurra liða riðla, og komast tvö efstu liðin úr hverjum riðli áfram í milliriðla.

Búið að raða sex liðum í riðla

Ísland er eins og fyrr segir í þriðja styrkleikaflokki af fjórum, og getur ekki mætt öðrum liðum í þeim flokki. Búið er að ákveða að Ungverjaland verði í A-riðli, Svartfjallaland í B-riðli, Frakkland í C-riðli, Sviss í D-riðli, Austurríki í E-riðli og Þýskaland í F-riðli.

Ísland hefur tvívegis áður keppt á EM en það var árin 2010 og 2012. Í bæði skiptin var liðið í neðsta styrkleikaflokki áður en dregið var í riðla, en hafa ber í huga að þá voru þátttökuþjóðir 16 en ekki 24. Ísland hafnaði í 15. sæti á báðum mótum.

EM í ár verður annað stórmót stelpnanna okkar í röð því þær urðu í 25. sæti á HM í desember síðastliðnum, með því að vinna Forsetabikarinn.