„Nú­tíminn er trunta“

„Það er búið að „laga” hurðarhún í Þinghúsinu. Nútíminn er trunta,“ skrifar Sigmundur Davíð á samfélagsmiðlum í færslu sem hefur fengið þó nokkur viðbrögð. Og flest allir virðast sammála Sigmundi, sem gerist ekki alltaf. 

„Sorglegt“, „eins og í fangelsi“ og „hrá og kubbsleg hönnun“ segja fylgjendur Sigmundar.

Sigmundur hefur lengi hampað eldri stíl í arkítektúr og uppbyggingu. Það gerði hann líka í gær þar sem hann benti á nýbyggingar í Hollandi. Þá hefur hann farið fögrum orðum um miðbæ Selfoss, sem er byggður á gömlum sögufrægum húsum.

Þetta er auk þess ekki í fyrsta sinn sem Sigmundur agnúast út í breytingar á húsnæði Alþingis. Í febrúar fór fréttastofa með Sigmundi í skoðunarferð um Smiðju, nýtt skrifstofuhúsnæði Alþingis, þar sem Sigmundur hafði eitt og annað til að setja út á.