Leita enn mannsins sem er um tví­tugt

Þetta kemur fram í tilkynningu frá lögreglunni á Norðurlandi eystra.

„Um kl. 18:30 í kvöld barst tilkynning um að karlmaður um tvítugt hefði fallið í Fnjóská nokkru ofan við ósa hennar, skammt frá Pálsgerði. Maðurinn var með þremur félögum sínum og hvarf hann þeim sjónum í ánni,“ segir í tilkynningunni.

Fram kemur að björgunarsveitir hafi verið kallaðar út ásamt þyrlu frá Landhelgisgæslunni. Þá hefur aðgerðarstjórn verið virkjuð á Akureyri.

„Maðurinn er enn ófundinn en um 130 viðbragðsaðilar eru nú að störfum við leit að honum. Vettvangsstjórn hefur verið skipuð á vettvangi. Fimm leitardrónar eru notaðir og sérþjálfaðir straumvatnsbjörgunarmenn eru komnir á vettvang. Þá er von á leitarhundum.“

Fram kemur að aðstæður á vettvangi séu erfiðar að því leyti að Fnjóská sé nokkuð lituð á þessum slóðum. „En einnig vegna þess að í ósum hennar kvíslast hún mikið þannig að leitarsvæði er víðfeðmt og sums staðar er vatnið það grunnt að erfitt er að koma við tækjum við leitina.“