Ó­trú­legt sjónar­spil á Grinda­víkur­vegi

Síðustu daga hefur hraun runnið hægt norðan við og meðfram Sýlingarfelli í átt að Grindavíkurvegi. Í tilkynningu frá Veðurstofunnui sagði að í morgun hafi framskriðið aukist og ljóst væri að hraunstraumurinn renni ákveðið í átt að Grindavíkurvegi norðan varnargarða við Svartsengi. Hraun rann að og yfir Grindavíkurveg á ellefta tímanum í morgun. 

Fréttamaður skellti sér á vettvang og lýsti því sem fyrir augu bar í beinni útsendingu í kvöldfréttum Stöðvar 2.

Ekki tímabært að ræða breytingar á varnargörðum

Þá var rætt við Jón Hauk Steingrímsson, verkfræðing hjá Eflu sem hefur unnið að gerð varnargarðanna við Grindavík og í Svartsengi. 

„Það er náttúrlega verið að fylgjast með þessari stöðu hérna núna og það sem er kannski langlíklegast er að þetta sé að tæma úr sér og við sjáum að tjörnin hérna fyrir ofan, hún er orðin hálftóm. Það þýðir að sá massi er þá kominn af stað og hann stoppar þá væntanlega á næstu klukkutímum. Svo er það bara þróunin næstu daga, hvort þetta verði þá eitthvað viðvarandi streymi eftir þessari hrauntröð þarna niður eftir eða hvort það byrji bara sami ferill aftur, að það byrji aftur að hlaðast í tjörnina upp frá og hún hnígi svo nokkrum dögum seinna,“ segir hann.

Þess vegna sé ekki tímabært að ræða breytingar á varnargörðunum.

„Um leið og eitthvað svona gerist þá byrja allir að hugsa og pæla og gera. En það eru svo sem engar ákvarðanir eða neitt svoleiðis komið. En það er verið að vinna nauðsynlega bakvinnu í greiningu. Greina hvað er hægt að gera í stöðunni áður en farið er eitthvað lengra með málið.“

Gróðureldar óheppilegur fylgikvilli

Einar Sveinn Jónsson, slökkviliðsstjóri í Grindavík, var á vettvangi í kvöld ásamt öðrum slökkviliðsmönnum, sem unnu hörðum höndum að því að slökkva gróðurelda.

„Einn af fylgikvillum eldgosa eru gróðureldar. Við höfum verið að kljást við það undanfarna daga, það hefur nú ekki rignt mikið á Reykjanesinu og er ekki á næstu dögum. Þannig að við höfum verið að kljást við gróðurelda allan hringinn í kringum gosið.“

Í morgun hafi hraunmolar komist yfir varnargarð í Svartsengi og kveikt í mosa innan garðsins. Slökkviliðsmenn hafi strax hafist handa við að rjúfa jarðveginn með gröfum til þess að fyrirbyggja að eldurinn dreifði úr sér. Það hefur ekki verið hægt alls staðar.

„Við komumst ekki að af öllum hliðum og það eru nokkrir staðir þar sem er að brenn. Við tökum þá bara svona jafnt og þétt og reynum að halda í skefjum. Við náum ekki að slökkva þá alla og höldum svo áfram strax í fyrramálið aftur.“ Unnið verði eitthvað fram eftir kvöldi.

Þurfa að finna leiðir inn í bæinn

Einar Sveinn segir erfitt að horfa upp á það að aðalvegurinn til og frá Grindavík sé nú þakinn þykku hrauni.

„Þetta verður ekki opnað í bráð þannig að það þarf að fara aðeins aftar í stafrófið, finna trikk til að opna þessar leiðir.“