Þor­leifur á­fram með Grinda­vík

„Það gleður okkur að tilkynna að samningar hafa náðst við Þorleif Ólafsson um að halda áfram þjálfun kvennaliðs Grindavíkur.

Þorleifur, eða Lalli eins og við og flestir Grindvíkingar köllum hana vanalega, tók við þjálfun liðsins þegar það kom upp í úrvalsdeild haustið 2021 og undir stjórn Lalla hefur liðið tekið stórstígum framförum ár hvert.“ - Segir í tilkynningu Grindavíkur.

Undir stjórn Þorleifs fór liðið í 4-liða úrslit bæði í bikar og deild en liðið tapaði 3-0 gegn Njarðvík í undanúrslitum Íslandsmótsins.

Vísir hafði samband við Þorleif sem viðurkenndi að það hefði kitlað hann að halda áfram með liðið og freista þess að ná enn lengra:

„Þegar maður lítur til baka þá hefði maður auðvitað viljað ná lengra og ná meira út úr því liði sem maður var með í höndunum í vetur. Þetta var í raun mjög auðveld ákvörðun þegar á hólminn var komið.

Í þessum aðstæðum sem eru uppi í lífi okkar Grindvíkinga þá rennur manni svolítið blóðið til skyldunnar að leggja sitt lóð á vogarskálarnar í íþróttalífi Grindavíkur og ég er þakklátur stjórninni fyrir traustið.“

Þorleifur er einnig framkvæmdastjóri UMFG en hann sagðist ekki hafa áhyggjur af því að það yrði of mikið á hans könnu í vetur.

„Ég hef ekki áhyggjur af því, ég gef mér tíma í að sinna þessum verkefnum og vel að verja tíma mínum í þetta. Svo þarf ég bara að finna mér góðan aðstoðarmann þar sem Bryndís [Gunnlaugsdóttir] er farin í barneignarleyfi. Með góðum aðstoðarmanni verður allt auðveldra.

Svo er ég líka svo vel giftur og fæ góðan stuðning frá konunni minni til að halda áfram.“ - Sagði Lalli léttur að lokum.