Krefst fræðslu um gyðinga­hatur eftir að tólf ára stúlku var nauðgað

Þrír drengir, tveir þrettán ára og einn tólf ára, voru handteknir í vikunni eftir að stúlkan tilkynnti lögreglu að tveir þeirra hefðu nauðgað henni í úthverfi Parísar á meðan sá þriðji tók nauðgunina upp á síma.

Ákærðir fyrir hópnauðgun og líflátshótanir

Í frétt breska ríkisútvarpsins er haft eftir stúlkunni að drengirnir hefðu nálgast hana í almenningsgarði í Courbevoie síðastliðinn laugardag, dregið hana á afskekktan stað, nauðgað henni og ausið fúkyrðum yfir hana á meðan.

Tveir drengjanna hafa verið ákærðir fyrir hópnauðgun og allir þrír fyrir gyðingahatur og líflátshótanir.

Mótmælt á götum úti og forsetinn blandar sér í málið

Frakkar fylktu liði á götum Parísar í gær og mótmæltu gyðingahatri. Í frétt Reuters segir að gyðingahatri hafi vaxið ásmegin í Frakklandi frá því að stríðið fyrir botni Miðjarðarhafs hófst þann 7. október.

Þar segir einnig að Emmanuel Macron Frakklandsforseti hafi í gær beðið Nicole Belloubet, menntamálaráðherra Frakklands, að skipuleggja sérstaka fræðslu í skólum til þess að taka á gyðingahatri og öðru kynþáttahatri, til þess að koma í veg fyrir að hatursorðræða komist inn í skóla með skelfilegum afleiðingum.