Eld­gosinu lauk á laugar­daginn

Lovísa Mjöll Guðmundsdóttir náttúruvársérfræðingur hjá Veðurstofunni segir landris við Svartsengi hægara en það hefur verið á svæðinu fyrir síðustu gos að svo stöddu. 

„Það er áfram lítil skjálftavirkni á svæðinu eins og hefur verið og það er áframhaldandi virkni í hrauntungunum sem þegar höfðu komið upp áður en gosinu lauk,“ segir Lovísa Mjöll. Búast megi við að þær skríði áfram þar til þær nái að storkna alveg.

Veðurstofan hefur gefið út nýtt hættumatskort sem gildir til 2. júlí. Farið var niður um hættuskala á þeim svæðum sem gossprungan er. Lovísa segir að kortið verði endurskoðað dag frá degi breytist eitthvað. 

Er útlit fyrir að það gjósi aftur eftir nokkrar vikur eins og hefur verið að gerast?

„Það er erfitt að segja til um það en þetta lítur að minnsta kosti út eins og það sé að endurtaka sig en svo verðum við bara að bíða og sjá,“ segir Lovísa Mjöll.