Moussa Diaby fer til Al-Ittihad í Sádi-Arabíu

Þessi 25 ára gamli Frakki kom til félagsins frá Bayer Leverkusen síðasta sumar fyrir fjörutíu milljónir evra. Hann skoraði tíu mörk og gaf níu stoðsendingar í alls 54 leikjum fyrir félagið.

The Athletic greinir frá því að Aston Villa selji hann nú á sextíu milljónir.

Aston Villa hefur styrkt sig úti á vængjunum í sumar. Samuel Illing-Junior, Lewis Dobbin og Jaden Philogene eru allir nýkomnir til félagsins og þá er Cameron Archer á leið aftur úr láni. Allir geta þeir spilað úti á hvorum kanti líkt og Diaby.

Hjá Al-Ittihad eru fyrir nokkur þekkt nöfn; Karim Benzema, Fabinho, N‘Golo Kante og þjálfarinn Laurent Blanc.