Troð­fullt á bíla­stæði við þjóð­veginn og löng bið fram undan

Á vef Vegagerðarinnar segir að þjóðvegurinn opni aftur við Skálm eftir klukkan átta, en honum hefur verið lokað í um einn og hálfan sólarhring vegna jökulhlaups úr Mýrdalsjökli.

Uppfært 20:13: fram kemur á vef Vegagerðarinnar að unnið sé að lokafrágangi á hringveginum og það geti tekið um klukkutíma. Biðin virðist því ætla að lengjast.

Gunnlaugur segir að troðfullt sé á bílastæðinu við Laufskálavörðu, en lokunarpósturinn er skammt frá. 

„Hér er haugur af bílum. Planið er alveg fullt og verið er að raða bílunum eins og hægt er,“ segir hann í samtali við fréttastofu. 

Hann spáir því að eftir að þjóðvegurinn opni á ný muni taka langan tíma að koma öllum bílunum af planinu og á veginn. Þá komi löng bílaröð til með að myndast. „Svo mun þetta örugglega ganga löturhægt yfir skemmda veginn,“ segir Gunnlaugur. Hann hrósar þó viðbragðsaðilum fyrir það sem virðist vel skipulagt starf.