Eins og staðan er í dag úti­lokar Klopp að snúa aftur í þjálfun

Klopp, sem lét af störfum sem knattspyrnustjóri Liverpool eftir síðasta tímabil, hafði gefið það út að hann hygðist taka sér hlé frá þjálfun eftir árin á Anfield sem höfðu í för með sér ljúfar stundir og titla. Stundir sem höfðu einnig í för með sér streitu sem hafði tekið sinn toll á Klopp. 

Frá því að hann yfirgaf herbúðir Liverpool hefur Jurgen Klopp verið orðaður við margar þjálfarastöður og nú síðast við landsliðsþjálfarastarfið hjá enska landsliðinu eftir að Gareth Southgate steig til hliðar í starfi eftir Evrópumótið fyrr í sumar. 

Klopp satt fyrir svörum á alþjóðaráðstefnu knattspyrnuþjálfara í Wurzburg og þar var hann inntur eftir því hvað framtíðin bæri í skauti sér fyrir hann. 

Játaði Klopp þar að hann væri óviss með það hvort hann myndi vilja snúa aftur í þjálfun. Hins vegar yrði knattspyrnan alltaf hluti af framtíðarsýn hans. Sama í hvaða formi það væri.

„Ég mun taka mér eitthvað fyrir hendur,“ sagði Klopp í Wurzburg. „Ég er of ungur til þess að eyða tíma mínum eingöngu í að spila paddle eða verja tíma með barnabörnunum. 

Mun ég fara aftur í þjálfun? Ég myndi eiginlega útiloka það á þessari stundu. Sjáum hvernig hlutirnir þróast næstu mánuðina. Eins og staðan er núna er það ekki að heilla.“