Fastur á leigumarkaði með verð­laust hús í Grinda­vík

„Svo byrjaði þessi skjálftavirkni í aðdraganda 10. nóvember, sem náði hámarki þá, og við flúðum bæinn eins og allir,“ segir Hafsteinn sem fór yfir þessi mál í Bítinu á Bylgjunni í morgun. 

Hann segir fjölskylduna hafa verið á hrakhólum síðan þá. Þau hafi dvalið í Reykjavík, Garðabæ og Hafnarfirði en hafi svo endað í Þorlákshöfn. „Þetta er búið að vera stór rússíbani og ég óska engum að ganga í gegnum það sama.“

Hann segir að vegna þess að þau hafi ekki verið búin að greiða lokagreiðslu á eign sinni hafi ekki verið gefið út afsal. En þau neiti að greiða hana vegna þess að húsið sé algerlega verðlaust í dag.

„Við vorum þarna í tíu vikur.“

Hafsteinn segir að eftir að hafa ráðfært sig við lögmenn hafi hann komist að því að þau séu algerlega réttindalaus. Seljendur segi að þeim beri að greiða þessa lokagreiðslu. Hann segir að þau geti greitt síðustu greiðsluna til seljenda og svo selt til Þórkötlu en að það yrði með margra milljóna króna tapi. Það sé tekið mið af brunabótamati og að þau myndu tapa á þessum viðskiptum.

Enginn lögfræðingur vilji taka málið

Hann segir engin fordæmi fyrir svona í íslenskri réttarsögu en að enginn lögfræðingur hafi viljað taka málið að sér. Það sé ekki bara þetta sem þurfi að athuga heldur sé húsið líka byggt í sigdal og segir Hafsteinn að það hafi, sem dæmi, ekki komið fram við sölu. Hvorki frá fasteignasala eða í gögnum frá bæjaryfirvöldum.

Hafsteinn segir þau hjónin fá leigustyrk en að þau þurfi að greiða af húsinu á meðan þannig staðan sé erfið.

„Húsið stendur við götuna. Þetta er raðhús. Hinum megin við götuna eru öll hús ónýt og þetta er stórhættulegt svæði. Sonur minn sagði við mig: Ef þú ferð þarna aftur færðu aldrei barnabörnin til þín.“

Hann segir skrítið að vera í þeirri stöðu að á einum sólarhring er allt í blóma en svo er alger óvissa. Þeirra staða sé ekki einsdæmi. Það séu fleiri í þessari stöðu og einhverjir jafnvel orðnir gjaldþrota.

„Það gleymist þessi hópur sem þorir kannski ekki að tala. Segir ekki neitt í fjölmiðlum og líður illa.“

Fleiri í sömu stöðu

Hann segir að kostnaðurinn við flutningana hafi hlaupið á tugum þúsunda eða jafnvel milljónum. Þau hafi þurft að kaupa sér ný föt og tæki.

Hafsteinn segir húsið sjálft ekki ónýtt. Þau hafi ekki getað tæmt húsið því þau séu ekki með pláss fyrir allt dótið sitt.

„Við erum algerlega réttindalaus. Við getum ekkert gert og erum algerlega föst,“ segir Hafsteinn og að það séu fleiri í sömu stöðu og jafnvel verri stöðu. Sumir hafi misst vinnuna og heilsuna, sem þau hafi ekki gert.

„Þessi óvissa er skelfileg. Það er erfitt fyrir okkur að plana nokkuð núna.“

Hafsteinn segir það vonda tilfinningu að hafa ekki stjórn á eigin lífi og hann óski engum að vera í stöðunni sem þau eru í.