Fram kemur á vef Veðurstofunnar að á Suðurlandi taki viðvörun gildi klukkan níu og sama á við um á Suðausturlandi. Á miðhálendinu tekur viðvörunin gildi klukkan tíu. Þær gilda þar til á eða rétt eftir hádegi á morgun.
Viðvarnanir á Faxaflóa, Breiðafirði og Vestfjörðum hafa verið í gildi síðan í gær og vara fram á morgun.
Segir í lýsingu að búast megi við talsverðri eða mikilli rigningu, auknu afrennsli og vatnavöxtum í ám og lækjum, sem auki hættu á flóðum og skriðuföllum. Fólk er hvatt til að sýna aðgát í nágrenni vatnsfalla og gera má ráð fyrir að óbrúaðar ár verði torfærar.
Þá getur þetta valdið auknu álagi á fráveitukerfum og fólk hvatt til að huga að niðurföllum til að forðast vatnstjón.
Hlýir vindar úr suðri
Um helgina beina lægð á Grænlandshafi í samvinnu við hæð við Bretland til okkar hlýju og röku lofti úr suðri. Búast má við ákveðinni sunnan- og suðaustlægri átt í dag og morgun með rigningu. Yfirleitt er þó úrkomulítið á Norðasturulandi og þar getur hiti náð yfir 20 stig.
Á morgun dregur smám saman úr úrkomu, þó verður dálítil væta með köflum síðdegis en áfram rigning suðaustantil. Bjart og hlýtt um landið norðaustanvert en þar bætir heldur í vind.
Veðurhorfur á landinu næstu daga
Á mánudag:
Suðlæg átt, 3-10 m/s og víða dálítil rigning, en bjart með köflum og þurrt austantil. Hiti 10 til 18 stig, hlýjast á Norðausturlandi.
Á þriðjudag:
Vestlæg átt, 3-10 m/s, yfirleitt bjart með köflum og þurrt, en þykknar upp vestantil um kvöldið. Hiti 8 til 17 stig, hlýjast á Suðausturlandi.
Á miðvikudag og fimmtudag:
Suðvestlæg átt með rigning öðru hvoru, en þurrt að mestu og norðan- og austanlands. Hiti 10 til 20 stig, hlýjast fyrir austan.
Á föstudag:
Útlit fyrir hæglætisveður og milt, skýjað með köflum og stöku skúrir.
