Það besta í lífinu hjá Ödegaard

Ödegaard er fyrirliði Arsenal sem er líklegt til afreka í ensku úrvalsdeildinni í vetur en hann er einnig fyrirliði norska landsliðsins.

Ödegaard er nú með norska landsliðinu og hitti fjölmiðlamenn í Kasakstan í dag þar sem norska liðið spilar í Þjóðadeildinni á morgun. Þetta var í fyrsta sinn sem hann talar opinberlega um fjölgunina í fjölskyldunni.

„Það er alveg á hreinu að þetta er risastórt. Þetta er það besta í lífinu þó að ég ætli ekki að fara að tala mikið um þetta hér. Ég hlakka til að verða pabbi,“ sagði Martin Ödegaard.

„Ég held að þetta henti mínu daglega lífi bara mjög vel,“ sagði Ödegaard. NRK segir frá.

Hinn 25 ára gamli Ödegaard á von á barninu með 28 ára kærustu sinni Helene Spilling. Þau sögðu frá tíðindunum á dögunum á samfélagsmiðlum sínum.

Ödegaard og Spilling hafa verið par síðan í byrjun síðasta árs og þetta er fyrsta barn þeirra beggja.

Norsku blaðamennirnir forvitnuðust um kyn barnsins en fengu hreint og skýrt svar.

„Ég hef engin plön um að segja ykkur það,“ sagði Ödegaard brosandi.