Trump víg­reifur en veit betur

Heimildarmenn blaðamanna New York Times úr röðum Trump-liða segja forsetann fyrrverandi hafa verið vígreifan eftir kappræðurnar og að hann hafi sagt öllum sem vildu heyra að hann hefði staðið sig vel og sigrað kappræðurnar.

Í frétt NYT segir hins vegar að aðgerðir Trumps eftir kappræðurnar gefi til kynna að hann hafi verið meðvitaður um raunverulega stöðu í kjölfar kappræðanna.

Eftir kappræður Trumps og Joes Biden, forseta, í júní var stungið upp á því við Trump að hann færi fram, í svokallað „spunaherbergi“ þar sem fjölmiðlafólk og talsmenn frambjóðendanna voru á meðan á kappræðunum stóð. Trump taldi það þó óþarfa, því Biden hefði staðið sig svo illa að hann gæti setið hjá og fylgst með neikvæðri umfjöllun um frammistöðu hans.

Strax eftir kappræðurnar gegn Harris var Trump mættur í spunaherbergið þar sem hann lýsti yfir miklum sigri og sagði frammistöðu sína hafa verið framúrskarandi.

Þegar Trump spurði ráðgjafa sína að því hvernig hann hefði staðið sig sögðu flestir að hann hefði verið frábær, samkvæmt heimildum NYT.

Trump og bandamenn hans hafa einnig haldið því fram að stjórnendur kappræðanna hafi staðið sig verulega illa og í raun verið með Harris í liði. Er það vegna þess að þau leiðréttu hann nokkrum sinnum.

Í einu tilfelli leiðréttu þau hann þegar hann sagði að Demókratar væru að myrða nýfædd börn og kalla það þungunarrof, sem er ekki rétt. Í öðru leiðréttu þau hann þegar hann hélt því fram að innflytjendur frá Haítí væru að éta gæludýr fólks, sem er þvæla.

Sjá einnig: Gerði sér mat úr kattaráti andlega veikrar konu

Í enn eitt skipti leiðréttu þau Trump þegar hann staðhæfði að innflytjendur og hælisleitendur væru að fremja glæpi í massavís. Alríkislögregla Bandaríkjanna (FBI) hefur gefið út tölfræði um að þessir hópar fremji hlutfallslega færri glæpi en innfæddir Bandaríkjamenn.

Samkvæmt greiningu CNN á kappræðunum sagði Trump ítrekað ósatt, eða rúmlega þrjátíu sinnum. Harris sagði einungis einu sinni ósatt, þó hún sé sögð hafa teygt sannleikann nokkrum sinnum.

Þora ekki að gagnrýna Trump

Kannanir og viðtöl fjölmiðla við kjósendur vestanhafs sýna að meirihluti fólks telur Harris hafa staðið sig betur en Trump. Enn er þó of snemmt að segja til um hvort kappræðurnar muni hafa áhrif á fylgi frambjóðenda en þau hafa að undanförnu mælst hnífjöfn, bæði á landsvísu og í mikilvægustu ríkjunum.

Þegar kemur að þingmönnum Repúblikanaflokksins hafa þeir að mestu hrósað Trump fyrir frammistöðu hans, sakað stjórnendur kappræðanna um að vera með Harris í liði. Örfáir hafa gagnrýnt frammistöðu Trumps.

Þegar Mike Johnson, forseti fulltrúadeildarinnar, var spurður út í frammistöðu Trumps gekk hann á brott án þess að svara spurningunni.

Öldungadeildarþingmaðurinn John Thune, sem vill taka við sem leiðtogi þingflokksins af Mitch McConnell, var óskýr í svörum og gekk sömuleiðis á brott, samkvæmt Washington Post.

Í grein WP segir að Repúblikanar hafi ekki sýnt nokkurn áhuga á því að fara í naflaskoðun, eins og Demókratar gerðu eftir að Biden stóð sig illa í kappræðunum við Trump í sumar. Þá hikuðu Demókratar ekki við að gagnrýna frammistöðu Bidens og leiddi það að endanum til þess að hann steig til hliðar og Harris tók við keflinu.

Ástæðan er sú að Repúblikanar óttast viðbrögð Trumps við gagnrýni, jafnvel þó hann tapi kosningunum. Hann mun áfram hafa tangarhald á kjósendum flokksins og gæti hefnt sín harkalega á öllum þeim sem fara gegn honum eða hann telur óvini sína, eins og hann hefur áður gert.