Sjáðu stór­glæsi­legt sigur­mark á gamla heima­vellinum

Breiðablik, Valur og Víkingur fögnuðu sigri í sínum leikjum í gær en FH, Þór/KA og Þróttur töpuðu hins vegar öll á heimavelli.

Breiðablik er með eins stigs forskot á Val á toppi deildarinnar eftir 4-1 sigur á Þrótti í Laugardalnum. Karitas Tómasdóttir, Andrea Rut Bjarnadóttir, Hrafnhildur Ása Halldórsdóttir og Samantha Rose Smith skoruðu mörk Blika. Þórdís Nanna Ágústsdóttir minnkaði muninn fyrir Þrótt.

Anna Rakel Pétursdóttir skoraði sigurmark Vals á móti Þór/KA en spilað var á KA-vellinum en þetta er gamli heimavöllur Önnu Rakelar síðan hún lék með KA á sínum yngri árum. Markið hennar var stórglæslegt eða þrumuskot upp í samskeytin eftir að boltinn datt fyrir hana utarlega í vítateignum.

Mörk Valsliðsins hefðuþó getað orðið fleiri því Jasmín Erla Ingadóttir skaut fram hjá úr vítaspyrnu í seinni hálfleik. Það má sjá sigurmarkið og vítið hér fyrir ofan.

Víkingar sækja að Þór/KA í baráttunni um þriðja sætið en aðeins einu stigi munar á liðunum eftir 3-0 sigur Víkingsliðsins á FH í Kaplakrika. Shaina Faiena Ashouri skoraði tvö síðari mörkin en það fyrsta skoraði Linda Líf Boama eftir tilþrif sem minntu helst á Brasilíumanninn Ronaldo þegar hann var upp á sitt besta.

Hér fyrir ofan og neðan má sjá mörkin úr öllum leikjunum.