Fótbolti

Viðar Ari fjórbrotinn

Aron Guðmundsson skrifar
Viðar Ari í leik með Ham Kam fyrr á tímabilinu
Viðar Ari í leik með Ham Kam fyrr á tímabilinu Mynd: Ham Kam

Tímabilinu hjá íslenska atvinnumanninum í fótbolta, Viðari Ara Jónssyni, er að öllum líkindum lokið eftir að hann lenti í hörðu samstuði við annan leikmann í leik með liði sínum HamKam um nýliðna helgi. Viðar Ari er fjórbrotinn á kjálka. 

Greint er frá stöðu Viðars Ara á vefsíðunni Fótbolti.net í morgun þar sem segir að Viðar liggi nú inn á sjúkrahúsi í Osló þar sem að hann bíður eftir aðgerð.

Atvikið átti sér stað í leik Ham Kam gegn Lilleström á laugardaginn síðastliðinn þar sem að Viðar fór meiddur af velli á 25.mínútu eftir að hafa áður lagt upp fyrsta mark Ham Kam í 5-0 sigri. 

Í frétt Fótbolta.net segir að Viðar hafi rotast við höggið, komið sé í ljós að hann sé með fjórbrotinn kjálka og í ofanálag missti hann tönn. 

Viðar hafði komið við sögu í 23 leikjum á tímabilinu hjá Ham Kam, skorað þrjú mörk og gefið tvær stoðsendingar en hann gekk til liðs við félagið í ágúst á síðasta ári frá FH. 

Ham Kam er sem stendur í áttunda sæti norsku úrvalsdeildarinnar.

Norski boltinn Íslendingar erlendis

Mest lesið


Fleiri fréttir

Sjá meira


×

Mest lesið