Orri með tvennu á Spáni: „Fyrsta stóra kvöldið þitt“

Orri, sem er aðeins tvítugur, kom til Real Sociedad fyrir metfé frá FC Kaupmannahöfn í lok síðasta mánaðar og ljóst að miklar vonir eru bundnar við hann hjá spænska félaginu.

Hann stóð undir þeim væntingum í dag með tveimur mörkum eftir að hafa komið inn á sem varamaður fyrir Mikel Oyarzabal á 61. mínútu.

Fyrra markið skoraði Orri á 80. mínútu og við það var skrifað á Twitter-síðu Real Sociedad: „Það fyrsta af mörgum.“ Sá sem skrifaði það þurfti ekki að bíða lengi eftir næsta marki Orra því það kom tíu mínútum síðar. Japaninn Takefusa Kubo hafði skorað fyrsta mark leiksins snemma leiks.

„Fyrsta stóra kvöldið þitt, Orri,“ var svo skrifað á Twitter-síðuna með myndbandi af Orra í fögnuðinum eftir leik.

Þetta var fimmti deildarleikur Orra á Spáni en hann hefur komið inn á sem varamaður í fjórum þeirra. Mörkin tvö í dag ættu að auka líkurnar á að hann verði í byrjunarliðinu gegn Anderlecht í Evrópudeildinni næsta fimmtudagskvöld, eða gegn Atlético Madrid í spænsku deildinni þremur dögum síðar, áður en Orri kemur svo til Íslands í landsleikina við Wales og Tyrkland.