Andri skoraði fyrir slaginn við Chelsea

Þetta var annað mark Andra fyrir Gent en hann skoraði í fyrsta leik sínum fyrir liðið, eftir að hafa verið keyptur frá Lyngby í sumar, í 1-0 útisigri gegn Kortrijk 28. júlí.

Sigurinn í dag var kærkominn fyrir Gent eftir óvænt 2-1 tap gegn Cercle Brugge á fimmtudaginn, í leik þar sem Andri Lucas átti stoðsendinguna í marki Gent.

Max Dean og Noah Fadiga komu Gent í 2-0 á fyrstu 13 mínútum leiksins í dag og Andri skoraði svo á 78. mínútu eftir að hafa komið inn á sem varamaður.

Gent er því með 16 stig og fór með sigrinum úr sjöunda sæti upp í það þriðja, en er jafnt Antwerpen sem er í 2. sæti. Genk er á toppnum með 22 stig. OH Leuven er í 12. sæti.

Næsti leikur Gent er af stærra taginu því liðið sækir enska stórliðið Chelsea heim á Stamford Bridge, í Sambandsdeild Evrópu á fimmtudaginn.