Óhappamynd Alec Baldwin brátt frum­sýnd

Í umfjöllun Deadline kemur fram að myndin verði sýnd á kvikmyndahátíðinni Camerimage sem fram fer 16. til 23. nóvember. Fram kemur í tilkynningu frá aðstandendum hátíðarinnar að minningu Hutchins verði þannig heiðruð en hún hafði sjálf lagt það til við leikstjórann Joel Souza að myndin yrði frumsýnd á viðkomandi hátíð.

Réttarhöldum vegna andláts Hutchens lauk í sumar. Þar var máli á hendur Baldwin vísað frá en hann hafði verið sakaður um manndráp af gáleysi. Hann hefur ávallt haldið því fram að skotið hafi óvænt hlaupið úr byssunni en að hann hafi ekki tekið í gikkinn.

Í ljós kom að Hannah Gutierrez-Reed, sem sinnti eftirliti með vopnunum á kvikmyndasettinu hafði ruglast á gerviskotfærum og raunverulegum skotum. Hún hlaut átján mánaða fangelsisdóm fyrir sinn þátt í dauðsfallinu.

Minningu Hutchins verði haldið á lofti

Fram kemur í umfjöllun Deadline að skipuleggjendur hátíðarinnar muni leggja sig fram um að heiðra minningu Hutchins við frumsýningu myndarinnar. Haldnar verði pallborðsumræður með leikstjóra myndarinnar Joel Souza, yfirmanni myndatöku Biöncu Cline og læriföður Hutchins Stephen Lighthill.

Enn fremur segir í umfjölluninni að þar verði andlát Hutchins rætt og hvernig framleiðendur myndarinnar báru sig að þegar tökum var haldið áfram á myndinni. Þá verður hlutverk kvenna við kvikmyndatöku sérstaklega rætt þar sem Hutchins annaðist kvikmyndatökustjórn í myndinni auk öryggis á setti.

Ekki er ljóst hvort Alec Baldwin muni mæta á frumsýninguna. Myndin er vestri og hverfist um þrettán ára gamlan strák sem þarf að sjá um litla bróður sinn eftir að foreldrar þeirra deyja og gerist á 19. öld í Wyoming í Bandaríkjunum. Hann fer á ferðalag með afa sínum sem hann hafði aldrei kynnst áður eftir að hann fær dauðadóm fyrir að hafa myrt bónda fyrir slysni.