Upp­reisnar­leið­togi snýr heim og tekur við rekstri Hrís­eyjar­búðarinnar

Frá þessu segir í tilkynningu þar sem fram kemur að Gabríel komi til Hríseyjarbúðarinnar frá Össuri þar sem hann hafi starfað sem sérfræðingur í fjármáladeild í þrjú ár. 

Gabríel er einnig formaður Uppreisnar, ungliðahreyfingar Viðreisnar.

„Hann er með BS gráðu í viðskiptafræði frá Háskóla Íslands með áherslu á fjármál. Sem rekstrarstjóri mun Gabríel leggja áherslu á að bæta rekstrargrundvöll verslunarinnar með auknum viðskiptum við eyjaskeggja og með breiðara vöruúrvali svo verslunin geti sinnt öllum helstu nauðsynjakaupum Hríseyinga. Sér hann fram á skemmtileg tækifæri í að að víkka út hlutverk búðarinnar í samfélaginu þannig hún sinni stærra samfélagslegu hlutverki á veturna.“

Haft er eftir Gabríel að hann segist þakklátur þeim móttökum sem hann hafi fengið á þeim stutta tíma síðan hann hóf störf og kveðst hann hlakka til að vinna með og í þágu íbúa Hríseyjar á komandi tímum.

„Það er gríðarlega verðmætt að fá tækifæri að snúa aftur í Hrísey og taka við rekstri verslunarinnar. Það hefur verið mikill uppgangur í Hrísey og ég er ánægður að geta tekið þátt í og stuðlað að því, í litlu samfélagi munar um allt og ég er spenntur að leggja mitt lóð á vogarskálarnar,” er haft eftir Gabríel.

Hríseyjarbúðin var stofnuð árið 2015 af fólki í eyjunni og hugsuð sem samfélagslegt verkefni. Í dag eru hluthafar í búðinni 79 talsins. Verslunin er opin allt árið og er þar einnig rekin afgreiðsla fyrir Póstinn, mannlegur hraðbanki, afhendingarstöð fyrir Vínbúðina og sjálfsafgreiðsluverslun utan opnunartíma.