Byrjunarliðið gegn Tyrkjum: Hetjan Logi kemur inn og þrjár aðrar breytingar

Stefán Teitur Þórðarson og Jón Dagur Þorsteinsson taka út leikbann í kvöld. Auk þeirra detta Kolbeinn Birgir Finnsson og Willum Þór Willumsson út úr byrjunarliðinu frá leiknum gegn Wales á föstudaginn.

Logi kom inn á í hálfleik gegn Wales, í stöðunni 0-2 fyrir gestina. Logi minnkaði muninn í 1-2 með sínu fyrsta landsliðsmarki á 69. mínútu og átti svo stóran þátt í sjálfsmarki Dannys Ward þremur mínútum síðar. Leikurinn endaði með 2-2 jafntefli.

Logi er í byrjunarliðinu í kvöld eins Åge hafði greint frá í aðdraganda hans. Auk hans koma nafnarnir Mikael Neville Anderson og Mikael Egill Ellertsson og Arnór Ingvi Traustason inn í byrjunarliðið.

Líkt og gegn Wales byrja þeir Orri Steinn Óskarsson og Andri Lucas Guðjohnsen saman í framlínu Íslands. Gylfi Þór Sigurðsson byrjar á bekknum en hann kom inn á sem varamaður undir lokin gegn Wales.

Leikur Íslands og Tyrklands hefst klukkan 18:45 og verður sýndur í opinni dagskrá á Stöð 2 Sport. Upphitun fyrir leikinn hefst hálftíma fyrr.