Sakar Verka­manna­flokkinn um af­skipti af kosningunum

Teymi Trump hefur sakað Verkamannaflokkinn um að ólögmæt afskipti af kosningunum, með því að hafa sent flokksmenn til Bandaríkjanna til að starfa fyrir framboð andstæðings síns, Kamölu Harris.

Í kvörtuninni er hinum meintu afskiptum líkt við inngrip Breta í málefni Bandaríkjanna þegar þau freistuðu þess að verða sjálfstæð sambandsríki.

„Það fór ekki vel fyrir þeim síðast þegar fulltrúar breskra stjórnvalda reyndu að ganga dyra á milli í Bandaríkjunum,“ segir meðal annars í kvörtuninni, þar sem einnig er vísað til þess að um þessar mundir séu 243 ár frá því að Bretar gáfust upp í Yorktown.

Um sé að ræða grímulaus inngrip erlends ríkis, með samþykki framboðs Harris.

Keir Starmer, forsætisráðherra Bretlands, segir umrædda flokksmenn sjálfboðaliða sem hafi ákveðið að leggja kosningabaráttu Harris lið á eigin tíma. Þeir séu ekki að störfum fyrir Verkamannaflokkinn.

Margra ára hefð sé fyrir sjálfboðavinnu flokksmanna fyrir forsetakosningar í Bandaríkjunum.