Hver er þessi Rúben Amorim?

Samkvæmt enskum fjölmiðlum er United tilbúið að greiða riftunarákvæði í samningi Amorims við Sporting sem hann hefur stýrt síðan 2020. En af hverju er United klárt að borga tíu milljónir evra, eða einn og hálfan milljarð króna fyrir þennan 39 ára Portúgala.

Fyrir það fyrsta hefur hann náð árangri á þjálfaraferlinum sem er þó ekki langur. Undir stjórn Amorims hefur Sporting unnið portúgalska meistaratitilinn í tvígang og deildabikarinn tvisvar. Hann stýrði Braga einnig til sigurs í deildabikarnum skömmu áður en hann tók við Sporting.

Vinnusamur liðsmaður

Amorim átti fínan feril sem leikmaður en honum lauk þó nokkuð snemma vegna meiðsla. Eftir að hafa leikið með Belenenses á árunum 2003-08 gekk Amorim í raðir Benfica 2008. Þar lék hann þar til ferlinum lauk 2017. Amorim var tvisvar lánaður á tíma sínum hjá Benfica, til Braga 2012-13 og Al-Wakrah í Katar 2015-16.

Hjá Benfica vann Amorim tíu stóra titla, þar á meðal portúgalska meistaratitilinn í þrígang. Hann spilaði aðallega sem miðjumaður en gat einnig leyst stöðu hægri bakvarðar. Amorim, sem lék fjórtán landsleiki á árunum 2010-14, þótti fyrst og fremst góður liðsmaður; vinnuhestur með gott hugarfar.

Eftir að hafa þurft að hætta vegna meiðsla aðeins 32 ára var Amorim ráðinn þjálfari C-deildarliðsins Casa Pia sumarið 2018. Hann stoppaði þó stutt við þar vegna þess að hann hafði ekki tiltekin réttindi til að þjálfa og félagið átti yfir höfði sér refsingu frá portúgalska knattspyrnusambandinu vegna þess.

Þurfti bara þrettán leiki til að sannfæra Sporting

Amorim stýrði varaliði Braga í C-deildinni í þrjá mánuði áður en hann var ráðinn stjóri aðalliðsins í á Þorláksmessu 2019. Amorim stýrði Braga einungis í þrettán leikjum. Liðið vann tíu þeirra, meðal annars Porto í úrslitaleik deildabikarsins.

Þrátt fyrir stuttan tíma við stjórnvölinn hjá Braga gerði hann nóg til að fanga athygli forráðamanna Sporting. Og þrátt fyrir að hafa aðeins stýrt Braga í rúma þrjá mánuði og vera einungis 35 ára borgaði Sporting tíu milljónir evra til að fá Amorim yfir til Lissabon. Hann er þriðji dýrasti knattspyrnustjóri sögunnar.

Sporting hafði ekki unnið portúgalska meistaratitilinn síðan 2002 en taldi sig hafa fundið rétta manninn til að binda endi á þá bið. Og forráðamenn Sporting reyndust hafa rétt fyrir sér. Á fyrsta heila tímabili Amorims við stjórnvölinn hjá varð liðið Portúgalsmeistari í fyrsta sinn í nítján ár, auk þess að vinna deildabikarinn. Sporting var taplaust í 32 leikjum í röð og tapaði aðeins einum af 34 leikjum sínum í portúgölsku úrvalsdeildinni. Liðið skoraði 65 mörk og fékk aðeins á sig tuttugu.

Tímabilið á eftir, 2021-22, lenti Sporting í 2. sæti portúgölsku deildarinnar þrátt fyrir að fá jafn mörg stig (85) og meistaratímabilið. Sporting komst hins vegar í sextán liða úrslit Meistaradeildar Evrópu og vann deildabikarinn annað árið í röð. Sporting vann deildabikarinn þriðja sinn í röð tímabilið 2022-23 og komst í átta liða úrslit Evrópudeildarinnar en lenti í 4. sæti í deildinni.

Góður að vinna með ungviðið

Eftir vonbrigðatímabil risu Sporting-menn upp á afturlappirnar á síðasta tímabili og endurheimtu portúgalska meistaratitilinn. Stór ástæða fyrir því var frammistaða sænska framherjans Viktors Gyökeres sem var markakóngur portúgölsku deildarinnar með 29 mörk.

Eins og veruleiki portúgalskra liða er hefur Amorim þurft að fylla skörð lykilmanna sem hafa farið í stærri deildir. Hann hefur verið klókur á félagaskiptamarkaðnum og verið duglegur að nýta hina rómuðu akademíu Sporting. Amorim er góður að vinna með yngri leikmönnum og stuðningsmenn United fá eflaust vatn í munninn yfir því sem getur gert með menn á borð við Alejandro Garnacho og Kobbie Manioo.

Meðal leikmanna sem hafa blómstrað undir stjórn Amorims á undanförnum árum og farið annað má nefna Joao Palhinha, Nuno Mendes, Pedro Porro, Matheus Nunes og Manuel Ugarte en sá síðastnefndi leikur einmitt með United í dag. Þá er þess eflaust ekki langt að bíða að varnarmaðurinn Goncalo Inácio fari í stærra lið.

Líkt við Mourinho

Síðan hann var hjá Casa Pia hefur Amorim notað þrjá miðverði og hjá Sporting spilaði hann aðallega leikkerfið 3-4-3. Honum hefur verið líkt við sjálfan José Mourinho en þykir vera aðeins meiri rómantískri í fótboltahugsun en hann. Liðin hans Amorims vilja halda boltanum, pressa framarlega og sækja af krafti þegar tækifærin gefast. 

Amorim á þó margt sameiginlegt með Mourinho og er mikill aðdáandi hans. Hann þykir til að mynda minna á Mourinho hvernig hann freistar þess láta lið sín að nýta sér veikleika andstæðinganna og þegar kemur að því vera taktíkst sveigjanlegur. Amorim var einmitt lærlingur hjá Mourinho fyrir nokkrum árum þegar hann stýrði United.

Amorim hefur verið orðaður við önnur félög undanfarin ár og þótti meðal annars vera líklegur til að taka við Liverpool þegar Jürgen Klopp tilkynnti að hann væri að hætta með liðið. Þá ferðaðist hann til Lundúna í vor til að ræða við West Ham United. Amorim hafnaði Hömrunum og baðst seinna afsökunar á að hafa farið í viðræður við félagið. Það var kannski lýsandi fyrir Amorim sem þykir vera mjög hreinskilinn í samskiptum við leikmenn og fjölmiðla.

Eitt er þó að þjálfa í Portúgal og annað að stýra jafn stóru félagi og United þar sem margir hæfir stjórar hafa á endanum hlaupið á vegg síðan Sir Alex Ferguson hætti 2013. Meðal þeirra er Mourinho. 

En Amorim virðist hafa margt sem átrúnargoðið sem hann hefur og skilaði honum stórkostlegum árangri framan af stjóraferlinum. Hann er taktískt sterkur og sveigjanlegur, með mikinn sigurvilja og hefur sjarma sem Erik ten Hag var að mestu laus við. Svo þykir hann góður að vinna með yngri leikmönnum sem höfðar alltaf til manna hjá United. 

Félagið hefur verið hálfgerður sirkus síðustu ellefu ár en forráðamenn vonast til að þeir séu loksins búnir að finna rétta sirkusstjórann. Þegar hann tók við Sporting var til að mynda hver höndin uppi á móti annarri en honum tókst að lægja öldurnar þar. Það er ljóst að Amorim mun þurfa að taka á öllu sínu til að koma United aftur á toppinn en á stuttum stjóraferli hefur hann sýnt færni sína.

Við skrif greinarinnar var meðal annars stuðst við greinar frá BBC og Sky Sports um Amorim.