Hátt­settur Trump-liði segir RFK hafa sann­fært hann um skað­semi bóluefna

Howard Lutnick er maðurinn sem leiðir áðurnefnt stjórnarskiptateymi en hann sagði í viðtali við CNN að eftir að hafa rætt við Kennedy í um tvo og hálfan tíma í vikunni um bóluefni. Í viðtalinu ýtti hann meðal annars undir þá fölsku samsæriskenningu að bóluefni valdi einhverfu í börnum.

Ekki er vitað hvað veldur einhverfu en vísindamenn eru sammála um að bóluefni geri það ekki. Samsæriskenningar þar að lútandi má að miklu leyti rekja til rannsóknar frá 1998, sem var harðlega gagnrýnd á sínum tíma og síðar dregin til baka.

Lutnick gaf til kynna að Kennedy hefði sagt að skaðsemi bóluefna mætti rekja til laga frá 1986 sem hann sagði skýla framleiðendum bóluefna frá skaðabótaskyldu. Eins og fram kemur í frétt New York Times snúa lögin að stofnun verkferla til að bæta fólki fyrir mögulegan skaða vegna bólusetningar. Slíkt er gífurlega sjaldgæft en forsvarsmenn lyfjafyrirtækja voru að hætta framleiðslu bóluefna vegna innihaldslausra lögsókna.

Umrædd lög breyttu með engum hætti ferlinu varðandi framleiðslu bóluefna og eftirlit með öryggi þeirra.

Í viðtalinu sagði Lutnick við Kaitlan Collins frá CNN: „Af hverju telur þú bóluefni örugg? Það er engin vöruábyrgð lengur.“

Þá gaf hann einnig til kynna að börn fengu of mikið af bóluefnum

Þá sagði Lutnick að Kennedy fengi ekki stjórn á stórum hlutum heilbrigðiskerfis Bandaríkjanna, eins og Kennedy sjálfur hefur gefið til kynna, en hann fengi aðgang að umtalsverðum gögnum úr heilbrigðiskerfinu.

„Ég held það verði frekar töff að gefa honum gögnin. Sjáum hvað hann fær út úr þeim,“ sagði Lutnick.

Í viðtalinu á CNN sagði Lutnick einnig að auðjöfurinn Elon Musk yrði ekki í ríkisstjórn Trumps. Það væri vegna þess að hann gæti ekki selt fyrirtæki sín Tesla og SpaceX, en þess í stað yrði hann nátengdur ríkisstjórninni og myndi skrifa hugbúnað fyrir Hvíta húsið.

Sjá einnig: Vill rétta Musk niðurskurðarhnífinn

Eftir að viðtalið var birt stóð Lutnick frammi fyrir töluverðri gagnrýni. Birti hann þá yfirlýsingu á X þar sem hann sagði að hann og eiginkona hans treystu læknum þeirra og hefðu bólusett sig sjálf og börn þeirra. Hins vegar treystu ekki allir lyfjaeftirlitinu og það væri öllum greiði gerður ef Kennedy fengi aðgang að áðurnefndum gögnum.

Eitt af verkefnum Lutnicks við myndun mögulegrar ríkisstjórnar Trumps er að finna fólk til að vinna í henni. Hann ræðir við Trump á hverjum degi og hefur mikil áhrif við myndun ríkisstjórnar.

Kennedy, sem bauð sig sjálfur upprunalega fram til forseta Bandaríkjanna en hætti við og lýsti yfir stuðningi við Trump, sagði nýlega að Trump hefði lofað honum að hann fengi umfangsmikla stjórn á heilbrigðiskerfi Bandaríkjanna. Hann fengi einnig stjórn á sóttvarnarstofnun ríkisins og Matvæla og lyfjaeftirlitinu, svo eitthvað sé nefnt.

Framboð Trumps sendi í kjölfarið út yfirlýsingu um að þetta væri ekki rétt.

JD Vance, varaforsetaefni Trumps, sagði í hlaðvarpi hjá Joe Rogan á dögunum að hann væri einnig orðinn efasemdamaður um bóluefni. Ástæðuna sagði hann vera að hann hefði orðið lasinn eftir að hann fékk bóluefni gegn Covid, sem er eðlilegt.

Casey Means, læknir sem þykir líklegur til að leiða Matvæla- og lyfjaeftirlit Bandaríkjanna í ríkisstjórn Trumps, hefur einnig lýst yfir andstöðu við áðurnefnd lög frá 1986.

Notuðu mynd af barni

Kennedy hefur um árabil ýtt undir hræðslu fólks og vantraust á bóluefnum. Hann hefur meðal annars talað um bóluefni gegn Covid sem „glæp gegn mannkyninu“ og hefur lýst bóluefnum almennt sem „helför“. Læknar og hjúkrunarfræðingar hafa sagt að þessi viðleitni hans hafi skaðað fólk víðsvegar um heiminn.

AP fréttaveitan sagði í fyrra frá sögu hins tólf ára Braden Fahey, sem lést á æfingu í amersíkum fótbolta árið 2022. Nokkrum mánuðum síðar var mynd hans á kápu bókarinnar „Cause unknown“ eða „Af ókunnum orsökum“.

Bókin fjallar meðal annars um það að bóluefnin gegn Covid eigi að hafa valdið fjölda dauðsfalla meðal ungs heilbrigðs fólks, sem ekkert bendir til að sé rétt. Hún er gefin út af hópi fólks sem er andvígt bóluefnum en hópur þessi er leiddur af Robert F. Kennedy yngri og skrifaði hann formála bókarinnar.

Foreldrar Faheys skildu þó ekki hvernig mynd af syni þeirra endaði á kápu bókarinnar. Bæði hafði enginn af þeim sem gáfu bókina út samband við þau og þar að auki hafði Braden aldrei fengið bóluefni gegn Covid. Hann hafði dáið vegna galla í æð í heila hans.

Enginn svaraði ítrekuðum tilraunum foreldranna til að hafa samban við höfund eða útgáfendur bókarinnar. Það var ekki fyrr en eftir að blaðamenn AP töluðu við útgefendur bókarinnar að þeir vildu tala við foreldrana.

Við greiningu blaðamanna kom í ljós að fjölmargir þeirra sem sagðir eru í bókinni hafa dáið vegna bóluefna gegn Covid, létust vegna allt annarra ástæðna.