Hareide fámall varðandi fram­tíð sína í starfi

Mikið hefur verið rætt og ritað um framtíð Norðmannsins í starfi og þjálfarar á borð við Frey Alexandersson og Arnar Gunnlaugsson verið orðaðir við starfið.

Sjálfur segir Hareide að hann og stjórn knattsspyrnusambandsins hafi ekki tekið samtalið varðandi framtíð hans í starfi en framundan eru lokaleikir Íslands í riðlakeppni Þjóðadeildarinnar gegn Svartfjallalandi og Wales ytra.

„Nei við höfum ekki tekið það samtal,“ segir Hareide. „Frá því að ég samdi fyrst við sambandið hef ég alltaf viljað eins árs samning. Vegna þess að við vitum aldrei hvað verður um mig á einu ári. Þess vegna höfum við þetta svona. Núna einbeitum við okkur að leikjunum framundan og tökum samtalið síðar.“

En viltu halda áfram með landsliðið inn í nýtt ár?

„Við þurfum bara að bíða og sjá. Verðum að einbeita okkur að því síðar. Samningurinn gildir út 30.nóvember. Svo bíðum við og sjáum.“

Hareide tók við íslenska karlalandsliðinu í apríl á síðasta ári en í upphafi þessa árs ákvað fyrrverandi stjórn KSÍ að endurnýja samning sinn við Norðmanninn til ársloka 2025. 

Hins vegar voru sett uppsagnar- og framlengingarákvæði í samninginn. Uppsagnarákvæðið getur verið virkjað við lok Þjóðadeildarinnar í undir lok þessa mánaðar en samningurinn framlengist sjálfkrafa ef Ísland kemst í umspil um sæti í lokakeppni HM 2026 og framlengist einnig sjálfkrafa ef Ísland kemst í lokakeppni HM 2026, fari svo að uppsagnarákvæðið verði ekki virkjað.

Ísland mætir Svartfjallalandi og Wales í lokaleikjum riðlakeppninnar í Þjóðadeildinni í næstu viku. Leikirnir verða báðir sýndir í opinni dagskrá á Stöð 2 Sport.

Viðtalið má sjá að neðan.