Daði Freyr tekur stefnuna til Íslands eftir áratug úti

Dóra Júlía Agnarsdóttir skrifar 19. nóvember 2024 11:03

Daði Freyr stefnir á jólatónleika í Gamla Bíói í desember og flutninga til Íslands. Aðsend

„Ég var meira jólabarn þegar ég var barn. Nú á ég tvö börn og þá snúast jólin eiginlega bara um þau,“ segir tónlistarmaðurinn og Eurovision stjarnan Daði Freyr. Daði virðist þó kominn í jólagírinn þar sem hann var að senda frá sér nokkrar jólaábreiður og stendur fyrir jólatónleikum í Gamla bíói í desember. Samhliða því stefnir fjölskyldan á að flytja aftur til Íslands.

„Ég hef alveg haft það á bak við eyrað í langan tíma að gefa út jólaplötu. Ég gaf út fyrsta jólalagið mitt 2018 og ætlaði fyrst að hafa það sem árlega hefð en svo tók bara annað við.

Í rauninni er ég að gera hana núna vegna þess að ég er að halda jólatónleika í Gamla Bíó í desember og er þess vegna að gera fullt af jólalögum. Það verða bara tekin jólalög á þessum tónleikum, flest í svona dansútgáfu, svo mér fannst þetta smá no brainer,“ segir Daði um tilkomu væntanlegrar jólaplötu.

Hér má heyra ábreiðu Daða Freys af laginu Komdu um jólin:

Klippa: Daði Freyr - Komdu um jólin

Stærsti Bandaríkjatúrinn til þessa

Daði hefur eytt góðum tíma í stúdíóinu að undanförnu eftir vægast sagt viðburðaríkt ár.

„Ég tók stærsta Bandaríkjatúr sem ég hef tekið, einn og hálfur mánuður af uppseldum tónleikum út um allt þar. Það var mjög gaman, svo tók ég líka tvær stórar tónlistarhátíðir þar í sumar.

Annars er ég mikið búinn að vera að einbeita mér að því að semja núna undanfarið fyrir næstu plötu. Þetta er í fyrsta skiptið þar sem ég er að leyfa mér að einbeita mér algjörlega að því bara að semja og ekki gera 100 hluti í einu. Næsta plata verður eitthvað.“

Daðo á tónlistarhátíð í Gdansk í Póllandi á dögunum.Karol Kacperski

Söngur, dans og sviti í jólafjöri

Hann segist hlakka mikið til að koma heim í desember.

„Ég get ekki beðið eftir þessum tónleikum. Þegar ég hélt jólatónleika síðast 2018 var það með skemmtilegustu tónleikum sem ég hafði spilað, allir að syngja með og dansa og svitna. Ég ætla að taka sama konsept og síðast en bara gera þetta miklu meira alvöru. Betri framleiðsla, meiri ljós, stærri salur, meira gaman.“

Aðspurður hvort hann sé með einhverjar órjúfanlegar jólahefðir segir Daði:

„Ekkert sem er ekki bara partur af venjulegum íslenskum jólum held ég. Við hlustum á klukkurnar hringja inn jólin og þá knúsast allir og segja gleðileg jól. Annars er þetta aðallega bara kósí.“

Daði hlakkar til að dansa inn jólin í Gamla bíói.Mmurawski

Heljarinnar breyting í aðsigi

Það er heilmikið á döfinni hjá Daða.

„Ég ætla að klára plötuna fyrri part næsta árs og vonandi kemur hún út á næsta ári líka. Svo sé ég fyrir mér að taka einn Evróputúr auk þess að spila á festivölum um sumarið.

Annars er það stærsta í þessu að við erum að stefna á að flytja til Íslands aftur, í fyrsta skipti í tíu ár svo það verður heljarinnar breyting. Ég ætla að setja upp góða vinnuaðstöðu þar og halda áfram mínu striki í tónlistinni en prófa að gera það frá Íslandi,“ segir Daði Freyr fullur tilhlökkunar að lokum.

Hér má finna nánari upplýsingar um tónleikana.

Tónleikar á Íslandi Jól Eurovision Íslendingar erlendis