Allir flokkar innan frá­vika í könnunum nema Flokkur fólksins

„Þetta er svolítið merkilegt því þarna erum við að eiga við fólk. Við erum að spyrja fólk hvað það ætlar að kjósa og íslenska kosningarannsóknin hefur margoft leitt það í ljós að um fjórðungur fólks tekur ákvörðun inni í kjörklefanum,“ segir Þóra en rætt var við hana um niðurstöður kosninganna í Bítinu á Bylgjunni í morgun.

Samkvæmt síðustu könnun Maskínu var samfylkingin með 21,2 prósent en endaði með 20,8 prósent og Viðreisn með 17,2 prósent en endaði með 15,8 prósent. Sjálfstæðisflokkurinn var með 17,6 prósent en endaði með 19,4 prósent. Flokkur fólksins mældist með 9,1 prósent en endaði með 13,8. Þá mældist Framsóknarflokkurinn með 8,6 prósent en endaði með 7,8 prósent. Miðflokkurinn mældist með 11,2 prósent en endaði í 12,1 prósent. 

Í síðustu könnuninni mældust Píratar inni með 5,4 prósent en enduðu í þremur prósentum. Vinstri græn voru með 3,9 prósent en enduðu með aðeins 2,3 prósent. Sósíalistaflokkurinn var með 4,5 prósent en endaði með fjögur prósent. Lýðræðisflokkurinn fékk svo eitt prósent atkvæða og var spáð því sama í síðustu könnun.

Hún segir niðurstöður síðustu könnunar Gallup hafa verið nær niðurstöðu kosninganna en síðasta könnun Maskínu sem var birt kvöldið fyrir kosningar. 

Síðasta könnun Gallup var einnig birt síðasta kvöldið fyrir kosningar. Þar mældist Samfylkingin með 20 prósent, Sjálfstæðisflokkurinn með 18,4 prósent, Viðreisn með 17,6 prósent, Flokkur fólksins með 12,6 prósent, Miðflokkurinn 11,1 prósent og Framsóknarflokkurinn með 6,8 prósent. Sósíalistar mældust með 4,8 prósent, Píratar með 4,1 prósent og Vinstri græn með 3,1 prósent. Lýðræðisflokkurinn mældist með 1,4 prósent.

„Við erum svona hálfu til eitt prósent frá öllum flokkum nema Flokki fólksins,“ segir Þóra og þá velti maður fyrir sér hvað hafi gerst.

Óvænt hversu margir flokkar á vinstri væng þurrkuðust út

Það séu auk þess þrír litlir flokkar sem ekki náði inn á þing eða kjördæmakjörnum þingmanni.

„Það kom mér á óvart,“ segir Þóra og að hún hafi skoðað þetta vel í gögnunum þeirra í aðdraganda kosninganna.

„Svandís var oft inni, Vinstri grænir voru oft inni með mann inni í Norðaustur. Sanna var oft inni. Svo ég taki einhver dæmi. En svo spyr maður sig líka. Þetta litla fylgi sem Sósíalistar og Vinstri græn fengu, var einhver lítill hluti af því sem fór á kjördag yfir á Flokk fólksins?“

Hún segir það hafa komið á óvart að vinstri flokkarnir hafi margir þurrkast út. Kannanir hafi bent til þess að einn þeirra flokka sem náðu ekki inn, Píratar, Vinstri græn og Sósíalistar, myndu ná inn.

„Vinstri græn náðu því aldrei en manni fannst á tímabilið að þau væru að sækja í sig veðrið en svo gáfu þau eftir þarna síðustu dagana, eða á föstudeginum. Við spáðum því að Píratar færu inn og Sósíalistar voru að hoppa inn og út. Þessi flokkar fengu minna en þeim var spáð í könnunum.“

Kannanir ekki spár

Þóra segir að mikið fylgi Flokk fólksins hafi komið fram í gögnunum þeirra en þau hafi ekki séð að þau væri eins stór og þau enduðu í Suðurkjördæmi

„Þau voru við það að velta Sjálfstæðisflokki úr sessi, en þau voru aldrei stærst hjá okkur fyrir kosningar," segir Þóra og  á þá við í Suðurkjördæmi

Þóra segir kannanir ekki spár. Metill geri spá með því að taka allar kannanir og niðurstöður þeirra og setur saman í eina spá. Metill taki líka tillit til sögunnar.

„Skoðanakannafyrirtækin eru ekki að birta spá, þau eru að segja: Svona er staðan núna,“ segir Þóra.

Hvað varðar Sjálfstæðisflokkinn segir Þóra að í upphafi síðustu viku hafi flokkurinn verið í um 13 prósent og svo hafi þau merkt aukningu alla vikuna á fylginu. Þau birtu niðurstöður könnunar á fimmtudag og föstudag og þau hafi séð að þau væru að sækja gríðarlega á. Á kostnað Viðreisnar líklega.

„Við sáum að Framsóknarflokkurinn var alla vikuna aðeins að stíga,“ segir Þóra og að Samfylkingin hafi haldið sjó alla vikuna.

Sjálfstæðisflokkurinn vanmetinn í þremur síðustu kosningum

Hún segir svo margt skemmtilegt í svona gögnum. Áður fyrr hafi Sjálfstæðisflokkurinn alltaf verið ofmetinn og því sé spurt í íslensku kosningarannsókninni hvort það sé líklegt að fólk ætli að kjósa Sjálfstæðisflokkinn því það hafi verið svo líklegt að það hafi ætlað að gera það. Núna sé búið að breyta um taktík og hjá þeim til dæmis spurt hvaða flokk sé ólíklegt að þau ætli að kjósa.

Hún segir Sjálfstæðisflokkinn hafa verið vanmetinn í síðustu þremur kosningum.

Viðtalið er hægt að hlusta á í heild sinni hér að ofan.