Loksins vann City

Eftir sjö leiki án sigurs vann Manchester City loks þegar Nottingham Forets kom í heimsókn. Lokatölur 3-0, Englandsmeisturunum í vil.

Kevin De Bruyne var í byrjunarliði City í fyrsta sinn síðan 18. september og hann gerði gæfumuninn í kvöld.

Á 8. mínútu skoraði Bernardo Silva með skalla eftir skallasendingu De Bruynes. Belginn skoraði svo sjálfur á 31. mínútu.

Þriðja markið kom svo á 57. mínútu. Jérémy Doku skoraði þá með góðu skoti í fjærhornið.

Þetta var fyrsti sigur City síðan liðið vann Southampton, 1-0, 26. október. Meistararnir eru í 4. sæti deildarinnar en Forest í því sjötta.