Efling lætur ekki af að­gerðum á meðan SVEIT endur­skoðar samning

„Við höldum því áfram sem við erum að gera, sem er að senda erindi á veitingahús, sem er að miðla upplýsingum til félagsfólks og annarra um það að láta ekki gabba sig til þess að ganga í þetta svokallaða stéttarfélag Virðingu. Jafnframt erum við að skoða fjölmargar aðrar leiðri til að stoppa þessa aðför að réttindum vinnandi fólks sem þarna hefur verið hrint í framkvæmd,“ segir Sólveig Anna í samtali við fréttastofu.

Fimmtungur hafi sagt sig úr SVEIT

Efling tilkynnti í gær um fjölmargar aðgerðir gegn meðlimum SVEIT. Þá kom fram í dag að fimmtungur meðlima SVEIT hefði sagt sig úr samtökunum eftir að tilkynning barst frá Eflingu um aðgerðirnar. SVEIT sagði svo síðdegis að þau ætluðu að endurskoða kjarasamning sinn við Virðingu eftir harða gagnrýni og að þau vonuðust til þess að Efling myndi láta af aðgerðum sínum á meðan.

Efling hefur harðlega gagnrýnt kjarasamninginn sem SVEIT hefur gert við Virðingu. Þau segja Virðingu gervistéttarfélag og svikamyllu og segja kjör lakari hjá félaginu en öðrum stéttarfélögum. Það sé gengið á kjör launþega í samningnum auk þess sem þau segja það gagna gegn grundvallarreglum á vinnumarkað að atvinnurekendur stofni sjálfir stéttarfélög sem þeir krefji svo starfsmenn sína um að ganga í. BSRB, BHM, Samiðn og fleiri félög hafa tekið undir gagnrýni Eflingar.

Í tilkynningu SVEIT í dag kemur einnig fram að þau hafi reynt að semja við Eflingu en að Efling hafi neitað að semja við þau. Sólveig Anna segir það ekki rétt. Þau hafi viljað semja við þau en þau myndi aldrei gera samning sem er með lakari kjörum en sá samningur sem þegar hefur verið gerður. Þar hafi samningaviðræðunum lokið.

Hafna því að þau séu að fremja lögbrot

Stjórn Virðingar stéttarfélags hafnar því alfarið í yfirlýsingu að samtökin séu að fremja lögbrot og ítrekar í yfirlýsingu að félagsmenn félagsins eigi rétt á því að stofna eigið stéttarfélag og gera þá samninga sem þeir séu tilbúnir að vinna eftir.

„Virðing stéttarfélag er stofnað af starfsmönnum í veitingahúsum. Sá kjarasamningur sem félagið gerði við Samtök fyrirtækja á veitingamarkaði lítur að störfum í veitingahúsum. Hann tekur mið af þeim vinnutíma og því starfsumhverfi sem þar ríkir. Kjarasamningur Eflingar er um kjör verkamanna, bifreiðastjóra, ræstingarfólks, ófaglærðs fólks á dagheimilum, iðnverkafólks, starfsfólks í kjötvinnslum, dekkjaverkstæðum, járn- og vélaverkstæðum og svo mætti lengi telja. Þannig er hann ekki sniðin að því starfsumhverfi sem ríkir á veitingastöðum,“ segir í yfirlýsingu Virðingar.

Efling hafi ekki einkarétt á að semja

Þar segja þau það ekki koma formanni eða stjórn Eflingar við að þau hafi viljað stofna sigg eigið stéttarfélag og vilji ekki vera í Eflingu. Efling hafi ekki einkarétt á því að semja fyrir þeirra hönd.

„Sá kjarasamningur sem Virðing og veitingamenn hafa nú undirritað er gerður af fúsum og frjálsum vilja undir formerkjum félagafrelsis sem varið er af íslensku stjórnarskránni. Í sumum atriðum veitir hann betri kjör en kjarasamningur Eflingar í öðrum lakari,“ segir í tilkynningunni.

Þar er einnig ýmissi gagnrýni á samninginn svarað og segir sem dæmi að þegar stofnaður verði sjúkrasjóður í nafni félagsins muni eitt prósent aukaframlag sem vinnuveitendur greiða nú til Virðingar notað í þann sjóð. Þangað til verði það notað til þess að koma styrkum stoðum undir félagið.

Muni laga misfellur í samningi

„Aðrar misfellur sem bent hefur verið á verða lagfærðar eins og röng tilvitnun í fæðingarorlofslög. Þá er samkomulag milli Virðingar og vinnuveitenda þess efnis að lagfæra nokkur atriði sem betur mega fara. Að lokum frábiður stjórn Virðingar sér þess að vera bendluð við lögbrot. Þá ítrekar stjórn Virðingar að félagsmenn þess hafa og eiga þann rétt að stofna sitt eigið stéttarfélag og gera þá samninga sem þeir eru tilbúnir að vinna eftir,“ segir að lokum.

Yfirlýsingin er ekki undirrituð en á heimasíðu félagsins kemur fram að formaður félagsins sé Jafet Thor Arnfjörð Sigurðarson og meðstjórnendur Jóhann Stefánsson og Jóhanna Sigurbjörg Húnfjörð. Þá segir að Valdimar Leó Friðriksson hafi verið ráðinn framkvæmdastjóri en að hann taki ekki til starfa fyrr en í janúar á næsta ári.