Stakk sam­fanga í­trekað á meðan hann af­plánaði átta ára dóm

Þetta var niðurstaða Héraðsdóms Suðurlands, sem kvað upp dóm þann 6. desember. Í dóminum segir að Ingólfur hafi verið verið sakfelldur fyrir tvær líkamsárásir, fjögur brot gegn valdstjórninni og eina sérstaklega hættulega líkamsárás.

Sérstaklega hættulegu líkamsárásina framdi hann þann 23. nóvember í fyrra, með því að stinga samfanga sinn ítrekað með sporjárni, með þeim afleiðingum að samfanginn hlaut átta stungusár og samfallið lunga.

Árásin var sögð tengjast skotárás sem framin var í Úlfarsárdal í byrjun sama mánaðar og önnur stunguárás daginn eftir að Ingólfur lét til skarar skríða hafi svo tengst árás hans.

Ekki fallist á að um tilraun hafi verið að ræða

Í dóminum segir að Ingólfur hafi játað háttsemi þá sem honum var gefin að sök í ákærunni en neitað að hann hafi haft ásetning til þess að drepa samfanga sinn.

Í framburði Ingólfs við aðalmeðferð vegna ákærunnar hafi komið fram að hann hafi haft spornjárnið á sér af tilviljun og hann hafi í raun bara verið að sveifla sporjárninu og ekki gert sér grein fyrir að hann hafi stungið samfangann fyrr en eftir á. 

Að mati dómsins sé fjarstæðukennt að Ingólfur hafi ekki gert sér grein fyrir því að hann væri að stinga samfangann. Af upptöku megi glögglega sjá að Ingólfur leggi margsinnis til samfangans, vitandi að hann væri með vopnið í hendi sér. Hafið væri yfir allan vafa að ákærði gerði sér grein fyrir að hann var að stinga brotaþola og að hann hafði ásetning til að stinga samfangann umrætt sinn með sporjárninu og að hann hefði að minnsta kosti ásetning til að meiða hann. 

Ingólfur hafi kannast við að hafa átt upptökin að átökum þeirra umrætt sinn. Aðspurður hvort honum hefði ekki dottið í hug að samfanginn gæti hlotið stungusár og áverka sem mögulega gætu verið lífshættulegir hafi hann kveðist ekki hafa dottið það í hug og bent á að hann hafi ekki reynt að stinga samfangann í höfuð, háls eða hjarta.

„You shot my friend“

Þá segir að Ingólfur hafi, aðspurður um ástæðu þess að hann hafi ráðist á samfangann, kveðist ekki hafa vita hvar hann hefði samfangann, sem hefði nýverið skotið vin hans og hann hafi ekki vitað hvort hann væri vopnaður. 

Hins vegar hafi Ingólfur neitað því að atlaga hans að samfanganum hafi verið í hefndarskyni vegna þess að hann hefði skotið vin hans, en um þá skotárás liggi ekkert fyrir í gögnum málsins.

Draga má þá ályktun að skotárásin sem um ræðir hafi verið skotárásin í Silfratjörn í Úlfarsárdal nokkrum dögum fyrir árás Ingólfs. Ungur maður að nafni Shokri Keryo hlaut þriggja og hálfs árs fangelsidóm fyrir árásina.

Einn maður varð fyrir skoti í árásinni, það er Gabríel Douane sem komist hefur endurtekið í kast við lögin undanfarin ár. Hann hlaut sár á hægri sköflung.

Í dóminum segir að Ingólfur hafi neitað að hafa viðhaft orðin „you shot my friend“ [þú skaust vin minn], en sagst ekki geta útilokað það. Telja verði sannað að hann hafi viðhaft þessi orð, með vísan til vættis vitna.

Loks segir hvað þetta varðar að af framburði samfangans og annarra vitna yrði ekki ráðið hvort ásetningur Ingólfs hafi staðið til að svipta samfangann lífi, eða aðeins til þess að ráðast að honum með umræddu sporjárni og stinga hann með því. Ekki yrði heldur ráðið að Ingólfur hafi mátt ætla að langlíklegast væri að samfanginn hlyti bana af atlögunni. Því væri ekki unnt að fella háttsemi hans undir ákvæði hegningarlaga um tilraun til manndráps.

Ungur þegar hann byrjaði að brjóta af sér

Í kafla dómsins um ákvörðun refsingar segir að samkvæmt sakavottorði hafi Ingólfur tvívegis áður verið dæmdur til refsingar. Árið 2021 hafi hann verið dæmdur í tveggja ára fangelsi fyrir brot gegn barnaverndarlögum, líkamsárás, þjófnað, rán, gripdeild, tilraun til ráns, vopnalagabrot og ávana- og fíkniefnabrot. Í dóminum þá komi fram að Ingólfur hafi ýmist verið sautján eða átján ára þegar brotin voru framin. Þannig hann verið átján ára þegar hann framdi fimm ránsbrot ásamt vopnalagabrotum og eina tilraun til ráns og vopnalagabrot, auk tveggja líkamsárása.

Þá hafi hann verið dæmdur í átta ára fangelsi í nóvember 2022 fyrir tilraun til manndráps og vopnalagabrot, en hann hafi verið nítján ára þegar hann framdi þau brot. Þar er vísað til skotárásar í miðbæ Reykjavíkur. 

Með vísan til sakaferils og tiltekinna ákvæða hegningarlaga um ákvörðun refsingar væri refsing Ingólfs hæfilega metin átta ára fangelsi. Ekki komi til álita að skilorðsbinda refsinguna að neinu leyti.

Þá var Ingólfur dæmdur til að greiða samfanganum 1,5 milljón króna í miskabætur, öðrum brotaþola 300 þúsund krónur í miskabætur og allan sakarkostnað upp á 5,9 milljónir króna.