Vill að Liverpool kaupi vinstri bakvörð Bournemouth

Andy Robertson var rekinn af velli eftir sautján mínútur í leik Liverpool og Fulham í ensku úrvalsdeildinni á laugardaginn.

Robertson hefur ekki átt sitt besta tímabil í vetur og Carragher segir að Liverpool þurfi að fjárfesta í nýjum vinstri bakverði.

„Hann þarf hjálp. Liverpool er ekki með neinn varamann og þetta er eitthvað sem þeir þurfa að leysa í janúar,“ sagði Carragher og nefndi svo manninn sem honum finnst að Liverpool ætti að kaupa: Milos Kerkez hjá Bournemouth.

„Hann er ákveðinn og hefur verið frábær síðan hann kom inn í ensku úrvalsdeildina. Við ættum að fylgjast með honum, sama hvort hann verður áfram eða fer,“ sagði Carragher.

Kerkez er ungverskur landsliðsmaður sem kom til Bournemouth frá AZ Alkmaar í fyrra.