Þeir sem vilji moka yfir niður­stöðuna vilji fresta fundinum

Þetta kom fram á Sprengisandi á Bylgjunni í dag, en þar ræddi Bryndís um stjórnmálin á árinu sem er að líða ásamt Helgu Völu Helgadóttur, lögmanni og fyrrverandi þingmanni Samfylkingarinnar, Sigríði Á Andersen, nýkjörnum þingmanni Miðflokksins og fyrrverandi ráðherra Sjálfstæðisflokksins, og Rósu Björk Brynjólfsdóttur, fyrrverandi þingmanni Vinstri grænna og Samfylkingar.

„Það er búið að ákveða að halda landsfund í febrúar. Það er sú ákvörðun sem liggur fyrir. Núna fóru að spretta einhverjar fréttir af því að einhver hafi verið að velta því fyrir sér hvort það væri skynsamlegt að fresta þessum fundi, og hafa hann eitthvað síðar,“ sagði Bryndís.

„Að það gæti mögulega orðið vont veður þessa helgi í febrúar eru ekki rök fyrir því að fresta landsfundi. En auðvitað er það alveg rétt að þegar þessi tímasetning var ákveðin þá var nú fólk að sjá fyrir sér að þetta yrði upptaktur að kosningum. Nú geri ég ráð fyrir því að það séu ekki endilega fjögur ár í kosningar, en ég á kannski ekki von á því að við séum að fara í kosningar næsta vor. Ég held að það verði aðeins lengri tími hjá þessari ríkisstjórn.“

Bryndís telur að Sjálfstæðismenn séu spenntir fyrir því að komast á landsfund, en slíkur fundur fór síðast fram árið 2022.

„Ég hef ekki heyrt nein góð rök fyrir því að fresta þessum fundi. Ég segi að það sé orðið mjög tímabært að halda landsfund.“

Tveir ólíkir viðburðir

Helga Vala sagði landsfund í aðdraganda kosninga og landsfund eftir kosningar vera tvö ólík fyrirbæri.

„Þeir sem vilja ná að moka yfir árangurinn í síðustu kosningum vilja auðvitað seinka. Þeir sem vilja hlaða í byssurnar fyrir einhver framboð sín en hafa kannski ekki haft sviðið,“ sagði hún og gaf til kynna að Jens Garðar Helgason, nýkjörinn þingmaður flokksins, væri að íhuga framboð á næsta landsfundi, en þar sem hann sé nýkominn á sviðið myndi henta honum að fresta.

Þess má geta að í samtali við fréttastofu í gær sagði Jens Garðar að Bjarni Benediktsson væri enn formaður flokksins, og algjörlega ótímabært að fara velta fyrir sér formannskjöri.

Aðspurður um hvort hann ætli í formannsframboð sagði Jens:

„Það er alls ekki þannig. Ég hef ekkert hugsað út í þetta.“

Mikilvægt að vera ekki í átökum í marga mánuði

Að mati Sigríðar, sem var lengi í Sjálfstæðisflokknum, eru kostir og gallar í báðum valkostum, að halda fundinum á settum tíma og í frestuninni.

„Ég hef í sjálfu sér ákveðna samúð með því að fresta þessu ef menn eru að horfa til þess að skipta um forystu í flokknum þá er ekkert óskynsamlegt, eins og Helga vala kallar það, að leyfa fólki að láta fólk sitt skína,“ segir hún.

„Fyrir almenna flokksmenn sem ætla að fara að kjósa nýja forystu er ekkert skrýtið að þeir vilji sjá aðeins framan í fólk í þessum nýju aðstæðum.“

Að mati Sigríðar er þó mikilvægt að stjórnarandstaðan sé funkerandi á þinginu. „Að flokkar séu ekki í innanflokksátökum svo mánuðum skipti.“

Nýr formaður utan þings?

Sigríður sagði að sér þætti áhugavert að sjá hvort sjálfstæðismenn myndu láta á það reyna að velja formann sem er utan þings.

„Ef einhvern tímann er tækifæri þá er það kannski núna að velja formann sem er ekki í þingflokknum. Þessi hugmynd hefur oft komið upp, en íhaldsamir menn verið á þeirri skoðun að formaður flokks verði að sitja á þingi.“

Bryndís tók fram að hún sæi ekki fyrir sér að næsti formaður flokksins yrði utanþings.