Harm­leikur í Hollywood: Hús fræga fólksins fuðra upp

Meðal þeirra sem misst hafa húsnæði í eldinum eru Paris Hilton, Anna Faris, Eugene Levy, Anthony Hopkins, Billy Crystal, John Goodman, Cobie Smulders auk hjónanna Adam Brody og Leighton Meester og þeirra Miles Teller og Keleigh Teller og Spencer Pratt og Heidi Montag.

PageSix greinir frá því að um sé að ræða elda sem kviknað hafa í Pacific Palisades hverfinu í Los Angeles. Vísir ræddi við leikstjórann Egil Örn Egilsson í morgun sem býr einmitt í hverfinu og er meðal þeirra sem hafa neyðst til þess að flýja heimili sín.

Stjörnurnar hafa keppst við að birta yfirlýsingar á samfélagsmiðlum vegna þessa náttúruhamfara. Í yfirlýsingu til fjölmiðla segist Billy Crystal vera harmi sleginn yfir því að hafa misst hús sitt og eiginkonu sinnar Janice Crystal. 

„Janice og ég bjuggum í húsinu okkar síðan 1979. Við ólum börnin okkar og barnabörnin upp þarna. Hver einasti sentímetri hús okkar var fullur af ást. Fallegar minningar sem ekki er hægt að taka frá okkur. Við erum miður okkar að sjálfsögðu en með stuðningi barna okkar og vina munum við komast í gegnum þetta. Pacific Palisades samfélagið er samfélag magnaðs fólks og við vitum að það mun rísa upp aftur. Þetta er heimili okkar.“

Paris Hilton segir engan eiga að þurfa að upplifa að horfa á hús sitt brenna í beinni útsendingu í sjónvarpinu en strandarhús hennar á Malibu brann til kaldra kola. Hún segir húsið stútfullt af minningum, þetta hafi verið heimili hennar þar sem hún hafi reynt margt.

Leikkonan Kate Beckinsale er ein þeirra stjarna sem misst hafa heimili sín í eldunum. Hún segir að ástandið sé líkt og í helvíti. Hún segir að hún og dóttir hennar hafi búið þar alla æsku hennar. Ekki bara sé heimilið á bak og burt heldur einnig skóli dóttur hennar og hver einasti veitingastaður sem þær hafi sótt saman.

„Pacific Palisades er samfélag sem mjög óvenjulegt er að sé til staðar í Los Angeles, þar sem er fullt af fjölskyldum með ung börn og gæludýr. Ég græt fyrir allt þetta fólk og gæludýrin þeirra, og mörg þeirra þekki ég. Ég syrgi fyrir fjölskyldurnar sem hafa misst allt og fólkið og dýrin.“

Mörg heimili í hættu

Fram kemur í umfjöllun Page Six að mikill fjöldi heimila annarra stjarna sé auk þess í hættu. Þar eru nefndar stjörnur líkt og Ben Affleck, sem var skipað að yfirgefa heimili sitt og segir Page Six hann hafa leitað skjóls hjá barnsmóður sinni Jennifer Garner.

Heimili hjónanna Tom Hanks og Rita Wilson er auk þess í hættu auk heimilis James Woods. Woods tók einmitt myndband af eldunum þegar þeir voru komnir í allra næsta nágrenni við hús hans. Star Wars stjarnan Mark Hamill hefur auk þess yfirgefið heimili sitt auk Police Academy leikarans Steve Guttenberg. Harrison Ford hefur auk þess verið myndaður við að vitja hús síns en örlög þessu eru á huldu að sögn bandaríska miðilsins.

Stórleikkonan Jamie Lee Curtis hefur jafnframt lýst því yfir að heimili hennar sé í hættu. Þá kemur fram í umfjöllun miðilsins að allar líkur séu á að heimili Harry Bretaprinsar og Meghan Markle verði einnig í hættu haldi eldarnir áfram sókn sinni. Þau búa í nærliggjandi hverfi, er ber heitið Montecito.

Þá kemur fram í umfjöllun erlendra miðla að framleiðsla á sjónvarpsefni og kvikmyndum hafi verið hætt, í óskilgreindan tíma. Þar eru nefndar upptökur á þáttum líkt og viðtalsþáttum Jimmy Kimmel og dramaþáttunum Grey's Anatomy.