Gerði ekki sam­komu­lag við Þór­dísi um formannsframboðið

Hún segist hafa fundið fyrir miklum stuðningi í gær og séð að í hópnum var fólk sem hefur undanfarið verið fráhverft honum. Fólk á fjölskyldualdri og reynsluboltar og fólk sem hefur verið að takast á innan flokksins.

„Það veitti mér fullvissu fyrir því sem ég hef fundið í símtölum síðustu vikna, að ég gæti leitt flokkinn saman og náð meiri árangri.“

Áslaug Arna segir flokkinn þurfa að gera nokkra hluti núna. Eitt sé að líta inn á við, að flokksstarfi sínu. Það hafi ekki verið rætt nógu mikið við flokksmenn og því séu þeir farnir að ræða út á við það sem þarf að ræða innan flokksins. Þegar hún byrjaði hafi slíkar umræður reglulega farið fram og þegar þeim lauk hafi fólk gengið samhent af fundi, með skýra stefnu. Þetta skorti í dag. Aðeins þannig sé hægt að halda í fylgið og ná í nýtt fólk.

Þá segir Áslaug að stutt sé í sveitarstjórnarkosningar. Þær séu mikilvægar og gera þurfi betur í til dæmis borginni. Þörf sé á nýjum borgarstjóra og að borgarstjórnarflokkur Sjálfstæðisflokksins gangi saman í takt við Sjálfstæðisstefnuna.

Ekki flokkur sem krýnir eina manneskju

Áslaug segir að þær Þórdís hafi ekki komist að samkomulagi um að hún skyldi fara í formanninn frekar en Þórdís. Þórdís hafi tekið sína eigin ákvörðun en þær átt mikilvæg samtöl um stöðu flokksins. Slík samtöl hafi hún líka átt við Guðlaug Þór Þórðarson og Guðrúnu Hafsteinsdóttur.

„Við erum ekki þannig flokkur, sem krýnir einn formann eða snýst um eina manneskju. Við erum fjöldahreyfing fólks á öllu landinu sem snýst um stefnu, en ekki einn aðila,“ segir Áslaug.

Hún segir þurfa að opna þá umræðu hvort eigi að opna kosningu um formann enn frekar. Hópurinn sem sitji landsfund sé lítill og það hafi verið átök á milli landsfunda vegna takmarkaðs sætafjölda. Ræða þurfi strúktúrinn eins og annað.

„Enda skiptir öllu máli að Sjálfstæðisflokkurinn nái vopnum sínum til þess að gera betur fyrir fólkið í þessu landi,“ segir Áslaug og að þau þurfi að hlusta betur til að ná betur til þeirra.

Áslaug segist ekki vera betri kostur en hinir sem mögulega munu bjóða sig fram. Hún sé samt sem áður tilbúin í þetta verkefni, telji sig vera með breiða skírskotun, geti leitt breytingar og talað skýrt fyrir stefnunni.

„Ég treysti Sjálfstæðismönnum eftir fimm vikur til að velja sér forystu og ég mun fylkja mér á bakvið þá forystu sem verður kjörin sama hver það verða.“

Les ekkert sérstakt úr mætingu þingflokks

Fjallað var um það í gær að þingflokkur flokksins hefði ekki látið sjá þig á framboðsfundi Áslaugar. Hún segist sýna því skilning. Þau séu fjórtán manna hópur og í hópnum séu margir sem séu að máta sig við embætti í flokknum. Því hafi hún skilning á því að þau hafi ekki mætt.

„Þetta var fyrsti fundurinn og kannski svolítill ísbrjótur í þessari stöðu sem er komin upp eftir að Bjarni Benediktsson ákvað að stíga til hliðar.“

Hún segist ekki vera búin að „velja sér“ varaformann. Flokkurinn eigi að gera það og þau bjóði ekki fram í hópum eða listum.

Hún segir Bjarna ekki hafa hvatt sig til að stíga fram. Hann hafi verið skýr með það þegar hann hætti að það væri nú þeirra hlutverk að velja sér forystu. Áslaug telur best fyrir fyrrverandi forystu að halda sig til hlés á meðan valið fer fram svo það sé ekki fráfarandi formaður sem ákveði hver leiðir flokkinn.

„Þetta er risaákvörðun, af því að ákvörðunin felst bæði í að bjóða sig fram á landsfundi, en ekki síst að vera tilbúin að sinna verkefninu af alúð og fullum þunga næstu árin. Sú ákvörðun er ekki tekin í léttu rúmi,# segir Áslaug. Til að taka þessa ákvörðun hafi hún þurft að taka púlsinn á flokksmönnum um land allt og eftir þau samtöl hafi hún tekið þessa ákvörðun.

Gildin týnst í stjórnarsamstarfi

Hún segir þurfa að skýra betur grunngildi stefnunnar. Þau hafi týnst í ríkisstjórnarsamstarfi við Vinstri græn þar sem þau þurftu að málamiðla verulega í sjö ár.

Áslaug Arna ræddi einnig stöðu Flokks fólksins og telur að þau eigi að skila öllum gögnum eins og þau hefðu verið skráður stjórnmálaflokkur ella skila peningunum sem þau fengu sem slíkur. Þá telur hún áríðandi að þau skrái sig strax sem stjórnmálaflokk en bíði ekki landsfundar.