Diljá Mist og Jens Garðar oftast nefnd til sögunnar

„Ég er ekkert búinn að gera upp hug minn í þessum efnum. Það mun bara skýrast betur í aðdraga fundarins,“ segir Jens Garðar í samtali við Vísi. Jens hefur um árabil verið virkur í grasrótarstarfi flokksins og látið að sér kveða í sveitarstjórnarmálum og í atvinnulífi. Hann tók í fyrsta sinn sæti sem aðalmaður á Alþingi þegar þing kom saman í síðustu viku. 

„Nýja starfið hefur átt hug minn allan undanfarið. Ég hef fyrst og fremst verið að einbeita mér að því að setja mig inn í verkefnin,“ segir Jens.

Diljá á leið um landið

Diljá Mist segist einnig í samtali við Vísi ekki hafa tekið neinar ákvarðanir um hugsanlegt varaformannsframboð enn. Ég var búin að segja það að ég ætla að taka stöðuna á fólkinu í flokknum og bara meta stöðuna út frá því. Ég er með fund á morgun á Ísafirði og síðan fer ég norður á Akureyri á fimmtudaginn og var í Kópavogi um helgina og það er svona dagskráin sem liggur fyrir,“ segir Diljá. 

Aðspurð segir hún fyrirhugað flakk um landið ekki vera lið í neinni formlegri kosningabaráttu. Hún hafi lagt það í vana sinn allt síðasta kjörtímabil að fara reglulega um landið. „Ég er að halda áfram bara uppteknum hætti,“ segir Diljá. Að öðru leiti tekur Diljá í svipaðan streng og Jens, það sé nóg framundan í þinginu og athyglin beinist að miklu leyti að þingstörfunum.

Diljá Mist hefur átt sæti á þingi frá 2021 og hefur meðal annars verið formaður efnahags- og viðskipanefndar og utanríkismálanefndar Alþingis. Áður hefur hún meðal annars starfað sem aðstoðarmaður Guðlaugs Þórs Þórðarsonar þegar hann var utanríkisráðherra og hefur gegnt ýmsum trúnaðarstörfum fyrir flokkinn.

Jón útilokar ekkert heldur

Þótt nöfn Diljár Mistar og Jens Garðars hafi einna helst verið orðuð við varaformanninn til þessa getur allt gerst á landsfundi. Vera má að fleiri nöfn blandi sér í leikinn þegar nær dregur landsfundi og jafnvel á fundinum sjálfum sem fer fram í Laugardalshöll dagana 28. febrúar til 2. mars næstkomandi.

Jón Gunnarsson þingmaður og fyrrverandi dómsmálaráðherra er einn þeirra sem nefndur hefur verið til sögunnar líka. „Ég hef ekkert ákveðið í þeim efnum og ekki gefið neitt út um það,“ segir Jón, spurður hvort hann hafi hug á að gefa kost á sér í forystu flokksins. Hann útiloki þó ekkert enn.

Þingmennirnir og fyrrverandi ráðherrarnir Áslaug Arna Sigurbjörnsdóttir og Guðrún Hafsteinsdóttir hafa báðar gefið kost á sér til embættis formanns flokksins og eru þannig til þessa þær einu úr röðum Sjálfstæðismanna sem freista þess að taka við af Bjarna Benediktssyni fráfarandi formanni. Þá hefur Vilhjálmur Árnason hyggst reyndar sækjast eftir endurkjöri sem ritari.

Einn listamaður, Snorri Ásmundsson, hefur einnig sagst sækjast eftir embættinu.